नीलकण्ठ नगरपालिकालाई खेलकुद क्षेत्रको हब बनाउछौँः मेयर ढुंगाना

धादिङ,८ फागुन
नीलकण्ठ नगरपालिकालाई खेलकुद क्षेत्रको हब बनाईने नेपाल नगरपालिका संघका अध्यक्ष एवं नीलकण्ठ नगरपालिकाका नगर प्रमुख भीम प्रसाद ढुंगानाले बताउनु भएको छ । खेलकुद क्षेत्रको विकास गर्नको लागि बजेट छुट्टाएर विभिन्न प्रतियोगिताहरु सन्चालन गरीरहेको बताउनुभयो । नीलकण्ठ नगरपालिकामा फुटबल,फुटसल,ब्याडमिन्टन जस्ता खेलकुदहरु सन्चालन गरीरहेको भन्दै उहाँले जिल्ला भित्र हुने ठुला प्रतियोगिताहरुलाई पनि आर्थिक सहयोग गरीरहेको बताउनुभयो ।

प्रजातन्त्र दिवसबाट सुरु भएको प्रथम मेयर कप फुटसल प्रतियोगिताको उद्घाटन गर्नुहुदै मेयर ढुंगानाले अन्य क्षेत्र जस्तै खेलकुद क्षेत्रलाई पनि ठुलो बजेट बिनियोजन गरेर काम गरीरहेको बताउनुभयो। धादिङबेसी स्थित खेलकुद मैदानको प्याराफिट सहित मर्मत संभार भईरहेको भन्दै उहाँले नगरपालिकाले त्यस खेलकुद मैदान निर्माणको लागि समेत बजेट बिनियोजन गरेको बताउनुभयो ।

यसैगरी नगर उप प्रमुख दिपक विश्वकर्माले नगरपालिकाले खेलकुद क्षेत्रलाई महत्वको साथ बजेट बिनियोजन गरेको बताउनुभयो । नीलकण्ठ नगर पालिकाका प्रमुख प्रशासकीय अधिकृत पुरुषोत्तम सुवेदीको अध्यक्षतामा सम्पन्न भएको उद्घाटन समारोहमा नगर प्रमुख भीम प्रसाद ढुंगानाको प्रमुख आतिथ्यता रहेको थियो । कार्यक्रममा नगर उप प्रमुख दिपक विश्वकर्मा,प्रमुख जिल्ला अधिकारी सुमन घिमिरे,वडा अध्यक्षहरु,कार्यपालिका सदस्यहरु,जिल्ला स्थित सरकारी कार्यालयका प्रमुख एवं प्रतिनिधि लगायतको आतिथ्यता रहेको थियो ।फागुन ७ देखि सुरु भएको प्रतियोगिता फागुन १० गतेसम्म सन्चालन हुनेछ ।

प्रतियोगितामा विजयी हुनेले प्रथम, द्धितिय (उपविजेता), तृतिय र सान्त्वनाले क्रमशः १ लाख १ हजार १११, ५१ हजार १ सय ११, २५ हजार र २० हजार रुपियाँ पुरस्कार पाउँनेछन् । उत्कृष्ट खेलाडी, उत्कृष्ट गोलकर्ता, उत्कृष्ट गोलरक्षक र उत्कृष्ट डिफेन्डरले ६–६ हजार पुरस्कार पाउने खेल संयोजक सरोज पाण्डेले बतउनुभयो ।धादिङवेशीस्थित धादिङ फुटसल एकेडेमीमा सुरु भएको प्रतियोगितामा १८ टिम सहभागी छन् ।