धादिङको धुवाँकोटमा माघे सङ्क्रान्तिमा गोरु जुधाई तथा हस्तकला प्रर्दशनी र सास्कृतिक कार्यक्रम हुने

धादिङ,२८ पुस
माघे सङ्क्रान्तिको अवसर पारेर धादिङको नीलकण्ठ नगरपालिका–१४ धुवाँकोटस्थित भङ्गेरीमा गोरु जुधाई र कृषि तथा हस्तकला प्रदर्शनीको आयोजना गरिएको छ।नीलकण्ठ नगरपालिकाको सहयोगमा संस्कृति संरक्षण तथा पर्यटन प्रवद्र्धन केन्द्र धुवाँकोटले मेलाको आयोजना र भंगेरी युवा क्लबको सह आयोजनामा कार्यक्रम हुन लागेको हो ।

परम्परादेखिनै गोरु जुधाउँदै आएको धुवाँकोटको भङ्गेरीमा यस वर्ष पनि गोरु जुधाइने केन्द्रका अध्यक्ष शिवकुमार श्रेष्ठले जानकारी दिनुभयो । “धुवाँकोटमा पहिलादेखिनै गोरु जुधाइने गरिएको थियो, केही वर्ष रोकिएको गोरु जुधाईलाई २०७१ सालदेखि व्यवस्थितरुपमा आयोजना गर्दै आएका छौँ”, उहाँले भन्नुभयोे। धुवाँकोट ऐतिहासिक महत्वका नौमध्ये एउटा महत्वपूर्ण कोट हो। विशेष गरी धुवाँकोटमा पर्यटन प्रवद्र्धन तथा स्थानीय उत्पादनको प्रवद्र्धनमा मद्दत पुग्ने उद्देश्यले कार्यक्रम आयोजना गरिएको हो ।

यसबर्ष कलाकारहरु कृष क्षेत्री,जुना एसडी र खुश्वु सुनारले सांस्कृतिक प्रस्तुती प्रस्तुत गर्ने आयोजकले जानकारी दिएको छ । गोरु जुधाइने स्थान नीलकण्ठ नगरपालिका–१४ धुवाँकोट  धादिङबेँसीबाट १२ किलोमिटरको दूरीमा पर्छ। गोरुलाई माघे सङ्क्रान्तिमा जुधाएर मनोरञ्जन लिने चलन धादिङ, नुवाकोट र रसुवामा पाइन्छ। बझाङ्गी राजा जयपृथ्वीबहादुर सिंहको मावली गाउँ तारुका आउँदा भान्जालाई देखाउनको लागि सुरु गरिएको गोरु जुधाउने परम्परा पछिल्ला वर्षमा धादिङमा पनि सुरु भएको छ।