धादिङमा डेङ्गुका बिरामी बढे : सतर्कता अपनाउन चिकित्सकको सुझाव

धादिङ,०६ असार ।
धादिङमा डेङ्गुको जोखिम बढ्दै गएको छ । जिल्लामा गर्मी मौसममा लामखुट्टेको टोकाइबाट सर्ने डेङ्गुका बिरामी देखिन थालेका छन् ।

धादिङ अस्पतालमा सरदर रुपमा दैनिक ५/६ जना डेंगुको संक्रमित आउने गरेको धादिङ अस्पतालका निमित्त मेडिकल सुपरिटेन्डेट डा.मधुकर दाहालले बताउनुभयो । धादिङको सबै स्थानीय तहका प्रमुखहरुलाई डेंगु संक्रमण फैलिरहेको हुनाले नागरिकहरुलाई सर्तक बनाउनको निम्ति परिपत्र पनि गरिसकेको डा.दाहालले बताउनुभयो ।

डेङ्गु नियन्त्रण गर्न सरसफाइमा विशेष ध्यान दिनुपर्नेमा जोड दिँदै डा.दाहालले हरेक मानिसको घरमा डेङ्गुको लार्भा हुर्कन सक्ने वातावरण भएको हुनाले पहिले घरबाट नष्ट गर्नुपर्ने बताउनुभयो ।

डेंगु लामखुट्टेको टोकाईबाट सर्ने संक्रामक रोग हो । डेंगुको भाइरसबाट संक्रमित भएको एडिस रजिष्टाइ जातको पोथीले यो रोग सार्छ । यो रोग सार्ने लामखुट्टे ग्रामीण क्षेत्रमा भन्दा शहरी क्षेत्रमा बढी पाइने गर्दछ ।

यसले स–साना पानी जमेका स्थानमा फूल पार्ने गर्दछ । खास गरी वर्षाको पानी जस्तै टिनका डब्बा, थोत्रा टायर, अलकत्रा वा मट्टितेलका खाली ड्रम, फुलदानी गमला, पानीका ट्याङ्की आदिमा यसले फुल पार्दछ ।

शहरी क्षेत्रमा यस्ता वस्तुहरु पर्याप्त मात्रामा हुने भएकाले पनि यो लामखुट्टे शहरमा बढी देखिने गरेको पाइन्छ । डेंगु एडिस एजिप्टाइ र एडिस एल्वोपेक्टस नामक लामखुट्टेले टोकेर हुने तीव भाइसल संक्रमण हो ।

यसका प्रमुख लक्षणहरु ज्वरो आउने, टाउको दुख्ने, वान्ता हेन, मांसपेशी तथा जोर्नीहरुमा पिडा हुने र छालामा एक प्रकारको रातो दाग देखिने आदि हुन् । यो रोग निको हुन दुईदेखि सात दिन सम्म लाग्छ ।

केही बिरामीहरुमा यो रोग डेङ्गी हेमोरेजिक फिवर विकसित भएर रक्तश्राव हुन्छ र ज्यान नै जोखिममा पर्न सक्छ । डेङ्गुको पहिचानको लागि मुख्य लक्षणहरु अचानक ज्वरो आउने टाउको दुख्ने साधारणा तथा आँखाको पछाडी दुख्ने, मांसपेशी दुख्ने, जोर्नी दुख्ने आदि हुन् । डेङ्गुका रोगीहरुको मांसपेसी तथा जोर्नी दुख्ने हुनाले यसलाई हड्डीतोड ज्वरो पनि भनिन्छ ।

डेङ्गुबाट बच्न लामखुट्टेको टोकाइबाट बच्ने, घरवरपर पानी जम्ने खाल्डाखुल्डीहरु पुर्ने,घर नजिक कुनै पनि झाडी नराख्ने, लामखुट्टेको टोकाइबाट बच्न झूलको प्रयोग गर्ने वा लामखुट्टे धुप वा क्रिम प्रयोग गर्ने, शरीर पुरै ढाक्ने कपडा लगाउने र सरसफाइमा ध्यान दिनुपर्ने धादिङ अस्पतालका निमित्त मेडिकल सुपरिटेन्डेट डा.दाहालले बताउनुभयो ।