पत्रकार महासंघ धादिङका संस्थापक अध्यक्ष स्व.वर्माको शालिक अनावरण

धादिङ,२५ चैत।
नेपाल पत्रकार महासंघ धादिङका संस्थापक अध्यक्ष स्व.सिताराम प्रसाद वर्माको शालिक अनावरण गरिएको छ ।

शुक्रबार महासंघको कार्यालय परिसरमा आयोजित एक कार्यक्रमका बिच प्रतिनिधि सभा सदस्य खेम प्रसाद लोहनीले अर्धकदको शालिक अनावरण गर्नुभएको हो।

कार्यक्रमलाई सम्बोधन गर्दै लोहनीले पत्रकारिता क्षेत्रलाई व्यवस्थित बनाउनको निम्ति संस्थापक अध्यक्ष वर्मा र संस्थापक सचिव एवं पुर्व अध्यक्ष राजेन्द्र प्रताप शाहको महत्वपूर्ण भुमिका रहेको बताउनुभयो।

संचार माध्यमले निर्वाचनलाई स्वच्छ निश्पक्ष स्वतन्त्र बनाउन महत्त्वपूर्ण भुमिका खेल्ने बताउनुभयो ।कार्यक्रममा पत्रकार महासंघ धादिङका अध्यक्ष राजाराम शर्माले वर्मा अन्तिम समयमा पनि कलम र कपि बोकेर नै संसारबाट बिदा हुनुभएको बताउनुभयो ।

यस्तै महासंघका संस्थापक सचिव एवम् पूर्व अध्यक्ष शाहको वहुआयामिक व्यक्तित्वमा केन्द्रित रहेर स्मारिका प्रकाशन गर्ने उद्घोष पनि गरिएको छ । स्व.वर्माको स्मृतिमा नीलकण्ठ नगरपालिकाको सहयोगमा स्वास्थ्य पत्रकारिता पुरस्कार स्थापना गरिएको छ भने स्व.शाहको स्मृतिमा ज्वालामुखी गाउँपालिकाको सहयोगमा पत्रकारिता पुरस्कार स्थापना गर्ने प्रस्ताव पनि अघि बढेको शर्माले बताउनुभयो।

कार्यक्रममा सहभागिहरुले वर्मा र शाहले पत्रकारीता क्षेत्रमा दिनुभएको योगदान जोगाएर राख्नु पर्ने,ईमान्दारिताको पत्रकारित सिक्नुपर्ने र समाजलाई परिवर्तन गर्नको निम्ति लागेको सपनालाई लिएर अगाडि बढ्न आग्रह गरेका थिए। कार्यक्रममा नेपाल पत्रकार महासंघका केन्द्रिय सदस्य ध्रुव रावल, प्रदेश अध्यक्ष शिव देवकोटा लगाएतको आतिथ्यता रहेको थियो।