धादिङका एकलाख सहित देशभरका ७५ लाख बालबालिकालाई आजदेखि टाइफाइडविरुद्धको खोप

धादिङ,२५ चैत।
धादिङका एकलाख सहित देशभरका १५ महिनादेखि १५ वर्ष उमेरका ७५ लाख बालबालिकालाई आजदेखि टाइफाइडविरुद्धको खोप लगाइँदैछ ।

स्वास्थ्य सेवा विभाग, बालस्वास्थ्य तथा खोप शाखाका अनुसारका प्रमुख सागर दाहालका अनुसार गाभी (खोपसम्बन्धी विश्वव्यापी सञ्जाल)ले नेपाललाई निःशुल्क टाइफाइड खोप उपलब्ध गराएको हो ।

खोप अभियानअन्तर्गत देशभर ५६ हजार ४२९८ खोप केन्द्र र विद्यालयमा खोप लगाइनेछ । यसका लागि १० हजार स्वास्थ्यकर्मी र एक लाख १२ हजार ८५८ स्वयमसेवक परिचालन गरिएको छ ।

जिल्लामा १ सय १७ स्वास्थ्य संस्था खोप केन्द्र र ४ सय ९९ बिद्यालय खोप केन्द्र गरी ६ सय १६ खोप केन्द्रबाट १ लाख १ हजार जना बालबालिकालाई खोप लगाइने स्वास्थ्य कार्यालय धादिङका खोप अधिकृत श्याम पोखरेलले जानकारी दिनुभयो।

धादिङमा खोप अभियान आजदेखी चैत २८ सम्म तोकिएको बिद्यालय स्थित खोप केन्द्रबाट र २९ चैतदेखि ३ वैशाखसम्म छुट भएका लक्षित समुहलाई लगाइने छ।हाल १५ महिनादेखि १५ वर्ष उमेरसमूहका बालबालिकालाई एक मात्रा खोप दिन लागेको बताउनुभयो ।पछि १५ महिनाका प्रत्येक बालबालिकालाई नियमित खोप कार्यक्रममार्फत एक मात्रा खोप दिने उहाँको भनाइ छ ।

यो खोप लगाएपछि अन्य खोपहरूमा जस्तै केही सामान्य असर हुनसक्ने उहाँको भनाइ छ । ‘सुई लगाएको ठाउँमा रातो हुने, सुन्निने र दुख्ने, हल्का ज्वरो आउने, टाउको दुख्ने, हात गोडा तथा जोर्नीहरू दुख्ने जस्ता सामान्य लक्षण देखिन सक्छन्।

यस्ता सामान्य लक्षणहरु बिस्तारै आफैं ठीक भएर जाने बताउनुभयो। यो खोप मासुभित्र दिइने र यसले वयस्क र बालबालिकामा दीर्घकालीन रोग प्रतिरोधात्मक क्षमता प्रदान गर्ने पोखरेलको भनाई छ।बालबालिकालाई नजिकैको खोप केन्द्रमा लगि खोप लगाउन स्वास्थ्य कार्यालय धादिङले अपिल समेत गरेको छ।

नेपालमा पहिलो पटक यो खोप दिइन लागिएको हो । नजिकैको खोप केन्द्रमा गएर खोप लगाउन सरकारले सबैमा अनुरोध गरेको छ ।पाँच वर्षमा नेपालमा चार लाख ५० हजारभन्दा बढीमा टाइफाइड रोगको संक्रमण देखिएको स्वास्थ्य विभागले जनाएको छ । अभियान १८ वैशाखसम्म चल्नेछ।