विपद् प्रभावितको उद्धार र पुनःस्थापनामा ज्वालामूखी जनप्रतिनिधिको एक महिनाको सेवा–सुविधा सहयोग गर्ने

धादिङ : रसुवाको भोटेकोशी नदीमा आएको बाढीका कारण त्रिशूली नदी क्षेत्रमा भएको जनधनको क्षतिबाट प्रभावित नागरिकको राहत तथा पुनःस्थापनामा सहयोग गर्न ज्वालामुखी गाउँपालिकाका जनप्रतिनिधिले एक महिनाको सेवा–सुविधा उपलब्ध गराउने भएका छन्।

गाउँपालिका अध्यक्ष, उपाध्यक्षसहित सम्पूर्ण जनप्रतिनिधिले आफूले पाउँदै आएको एक महिनाको सेवा–सुविधा विपद् प्रभावितको सहयोगका लागि राहत कोषमा जम्मा गर्ने निर्णय गरेका हुन्।गाउँपालिका अध्यक्ष यमनाथ दनैका अनुसार बाढीबाट प्रभावित नागरिकको उद्धार, राहत तथा पुनःस्थापनामा सहयोग पुर्‍याउने उद्देश्यले उक्त निर्णय गरिएको हो।

गाउँपालिकाले बाढीमा परी ज्यान गुमाएकाप्रति श्रद्धाञ्जली व्यक्त गर्दै मृतकका परिवारजनमा समवेदना तथा घाइतेको शीघ्र स्वास्थ्यलाभको कामना गरेको छ।

अध्यक्ष दनैले विपद्का समयमा स्थानीय सरकार, जनप्रतिनिधि, नागरिक समाज तथा सरोकारवाला निकायबीच समन्वय आवश्यक रहेको बताउनुभयो। प्रभावित नागरिकलाई तत्काल राहत उपलब्ध गराउने तथा पुनःस्थापनाका काममा आवश्यक सहयोग र समन्वय जारी राखिने उहाँको भनाइ छ।

भोटेकोशीमा आएको बाढी त्रिशूली नदीमा मिसिएपछि नदी तटीय क्षेत्रमा जनधनको क्षति भएको छ। विपद्पछि विभिन्न स्थानीय तह तथा निकायले प्रभावितको उद्धार, राहत र पुनःस्थापनाका लागि सहयोग जुटाउन थालेका छन्। यस अघि ज्वालामूखीका सवै कर्मचारीले ७ दिन तलव बराबरको रकम राहत कोषमा सहयोग गर्ने घोषणा गरिसकेका थिए ।