करार कर्मचारी हटाएको बिरोधमा सिद्धलेक गाउँपालिका – ७ को वडा कार्यालयमा तालाबन्दी

धादिङबेशी,२५ साउन । धादिङको सिद्धलेक गाउँपालिका–७ मा कार्यरत करार कर्मचारी शान्ति मगरातीलाई सेवामा निरन्तरता दिन माग गर्दै स्थानीयले वडा कार्यालयमा अनिश्चितकालीन तालाबन्दी गरेका छन् । स्थानीयले संयुक्त हस्ताक्षरसहित लिखित पत्र जारी गर्दै मगरातीको सेवा निरन्तर नगर्ने निर्णयप्रति असहमति जनाएका हुन् ।

वडा कार्यालयको ढोकामा स्थानियले टांस गरिएको पत्रअनुसार मगराती तत्कालीन जिल्ला विकास समितिमार्फत सामाजिक परिचालकका रूपमा नियुक्त भई हाल सिद्धलेक गाउँपालिका–७ मा कार्यरत थिइन् । गाउँपालिकाले २०८३ साउन ६ गतेसम्म वडा कार्यालयको काम गरिरहेकी मगरातीलाई पूर्वजानकारी नदिई सोही दिन साँझ सेवा निरन्तरता नदिने पत्र दिएको स्थानीयको दाबी छ ।

मगरातीसँगै नियुक्त भएका अन्य दुई कर्मचारीलाई भने निरन्तरता दिइएको भन्दै स्थानीयले समान प्रकृतिका कर्मचारीबीच फरक निर्णय गरिएको आरोप लगाएका छन् । मगरातीलाई सेवा निरन्तरता नदिनुको स्पष्ट र चित्तबुझ्दो कारणसमेत नदिइएको उनीहरूको भनाइ छ ।

पत्रमा कर्मचारीसँग प्रत्यक्ष सम्बन्ध नराख्ने विभिन्न विषय जोडेर कमजोरी देखाउन खोजिएको आरोपसमेत लगाइएको छ । स्थानीयले मगरातीमाथि अन्याय भएको दाबी गर्दै निर्णय पुनर्विचार गरी उनलाई सेवामा कायम राख्न माग गरेका स्थानिय शुरेश गिरिले बताएका छन् ।

माग सम्बोधन गराउन सिद्धलेक–७ का स्थानीयले भेला गरी वडा कार्यालय बन्द गर्ने निर्णय गरेको पत्रमा उल्लेख छ । स्थानीयले मागको बेवास्ता भए थप कडा आन्दोलनका कार्यक्रम अघि बढाउने चेतावनीसमेत दिएका छन् ।

तालाबन्दीका कारण वडा कार्यालयबाट प्रवाह हुने नियमित प्रशासनिक सेवा समेत प्रभावित भएको छ ।