ईभी हाइस रोकेर चालक श्रेष्ठ आफू अस्ताए, धादिङका १८ कानून व्यवसायीलाई बचाए

 धादिङबेशी,२४ साउन । धादिङबेसीबाट नेपाल बार एसोसिएसन धादिङको साधारण सभामा सहभागी हुन १८ जना कानून व्यवसायी लिएर बेनिघाट रोराङ गाउँपालिका–८ चैलिङतर्फ जाँदै गरेका ईभी हाइसका चालक मिननारायण श्रेष्ठको बाटोमै स्वास्थ्यमा अचानक समस्या आएपछि निधन भएको छ । असहज महसुस हुनासाथ श्रेष्ठले सवारी सुरक्षित रूपमा रोकेका कारण यात्रुहरू सकुशल भएका हुन् ।

बा प्र ०१–००६६ ख ८६१६ नम्बरको ईभी हाइस चलाइरहेका सिद्धलेक गाउँपालिका वडा न ३ निवासी ५० वर्षीय श्रेष्ठ शनिबार धादिङबेसीबाट चैलिङ सामुदायिक होमस्टेतर्फ जाँदै थिए । चैलिङ नजिकै बिदाङ पुगेपछि होमस्टेतर्फको बाटो सोधेर करिब ५० मिटर अगाडि बढेका श्रेष्ठले आफूलाई असहज महसुस भएपछि तत्काल सवारी रोकेका थिए । त्यसलगत्तै चालक सिटमै उनको स्वास्थ्य अवस्था गम्भीर बनेको थियो ।

सवारीमा रहेका कानून व्यवसायी र स्थानीयले श्रेष्ठलाई बाहिर निकालेर प्राथमिक उपचार गर्ने प्रयास गरेका थिए । खबर पाएपछि पुगेका स्वास्थ्यकर्मीले समेत कृत्रिम श्वासप्रश्वास तथा छाती थिचेर बचाउने प्रयास गरेका थिए । त्यसपछि एम्बुलेन्समार्फत अस्पताल पु¥याइए पनि चिकित्सकले उनलाई मृत घोषणा गरेका   थिए । श्रेष्ठलाई हृदयघात भएको प्रारम्भिक जानकारी आएको भए पनि मृत्युको आधिकारिक कारण खुलिसकेको छैन ।

कानून व्यवसायी दिनेश दुवाडीका अनुसार असहज महसुस हुनासाथ श्रेष्ठले सवारी रोकेकाले सम्भावित दुर्घटना टरेको हो । सवारीमा टंककुमार श्रेष्ठसहित रामचन्द्र भट्ट, रामकृष्ण अधिकारी, खिल गिरी, विश्वराज अधिकारी, गोपी अर्याल, अम्बिका घिमिरे, दिनेश दुवाडी, विनोदमान श्रेष्ठ, पुष्पविक्रम मल्ललगायत १८ जना कानून व्यवसायी सवार थिए ।

नेपाल बार एसोसिएसन धादिङका कानून व्यवसायी तथा शुभेच्छुकहरूले श्रेष्ठको निधनप्रति दुःख व्यक्त गर्दै श्रद्धाञ्जली दिएका छन् ।