त्रिपुरासुन्दरी गाउँपालिकाको कार्यालयमा अभद्र व्यवहार गर्ने सुरेन्द्र वाँडा पक्राउ

धादिङ,१० असार
त्रिपुरासुन्दरी गाउँपालिकाको कार्यालयमा कर्मचारीहरूले नियमित रूपमा कामकाज गरिरहेको समयमा मदिरा सेवन गरी कार्यालय बाहिरबाट ताला लगाई कामकाजमा अवरोध पु¥याउने एक व्यक्ति पक्राउ परेका छन्।जिल्ला प्रहरी कार्यालय धादिङका अनुसार त्रिपुरासुन्दरी गाउँपालिका–३ निवासी ४४ वर्षीय सुरेन्द्र वाँडाले आज बिहान गाउँपालिकाको कार्यालयमा पुगेर भुक्तानीसम्बन्धी विषयमा विवाद सिर्जना गरेका थिए। उनले कर्मचारीहरूलाई गालीगलौज गर्ने, धम्की दिने तथा अभद्र व्यवहार गरेको प्रहरीको भनाइ छ।

प्रहरीका अनुसार केही समयपछि मदिरा सेवन गरेका वाँडाले कार्यालय बाहिरबाट ताला र चाबी लगाई गाउँपालिकाको लेखा शाखामा कार्यरत प्रमुख प्रशासकीय अधिकृत र लेखा अधिकृतको कामकाजमा अवरोध पु¥याएका थिए। उक्त घटनापछि गाउँपालिकाले कानुनी कारबाहीको माग गर्दै प्रहरीमा निवेदन दिएको थियो।घटनामा संलग्न बाँडालाई प्रहरीले आजनै पक्राउ गरी अभद्र व्यवहारसम्बन्धी कसुरमा मुद्दा दर्ता गरी अनुसन्धान अगाडि बढाएको जनाएको छ। जिल्ला प्रहरी कार्यालय धादिङले सार्वजनिक कार्यालयको कामकाजमा अवरोध पु¥याउने तथा कानुनविपरीत गतिविधि गर्ने जो–कोहीलाई कानुनी दायरामा ल्याइने स्पष्ट पारेको छ ।