नीलकण्ठ नगरपालिकामा पालिका स्तरीय बृहत शैक्षिक सामग्री प्रदर्शनी सम्पन्न

धादिङ,५ असार
नीलकण्ठ नगरपालिकामा पालिका स्तरीय बृहत शैक्षिक सामग्री प्रदर्शनी कार्यक्रम भव्यताका साथ सम्पन्न भएको छ । नीलकण्ठ नगरपालिका शिक्षा, युवा तथा खेलकुद शाखाको आयोजनामा सञ्चालित उक्त प्रदर्शनीमा नगरपालिका क्षेत्रभित्रका विद्यालयका विद्यार्थीहरूले आफैँ तयार पारेका रचनात्मक तथा प्रयोगात्मक सामग्रीहरू प्रदर्शनमा राखिएको थियो ।विद्यार्थीहरूको अन्तर्निहित प्रतिभा प्रस्फुटन गराउने र सैद्धान्तिक ज्ञानलाई व्यवहारिक रूप दिने उद्देश्यले आयोजित यस प्रदर्शनीमा विभिन्न विद्यालयका विद्यार्थी तथा शिक्षक–शिक्षिकाहरूको बाक्लो उपस्थिति रहेको थियो।

प्रदर्शनीको अवलोकन नीलकण्ठ नगरपालिकाका उप–प्रमुख दीपक विश्वकर्मा, प्रमुख प्रशासकीय अधिकृत हरिदत्त कँडेल, वरिष्ठ शिक्षा अधिकृत प्रकाशदत्त भट्ट, सहायक शिक्षा अधिकृत कृष्णप्रसाद लम्साल तथा स्रोत व्यक्ति मेघनाथ कोइराला लगायतका सरोकारवालाहरूले गर्नुभएको थियो ।अवलोकनका क्रममा अतिथिहरूले विद्यार्थीहरूले बनाएका विज्ञान, प्रविधि, कला र स्थानीय संस्कृति झल्काउने सामग्रीहरूको रुचिपूर्वक निरीक्षण गर्नुभएको थियो।

अवलोकन पश्चात नीलकण्ठ नगरपालिकाका उप–प्रमुख दीपक विश्वकर्माले विद्यार्थीहरूको सिर्जनशीलताको उच्च प्रशंसा गर्नुभयो । उप–प्रमुख विश्वकर्माले भन्नुभयो, “किताबी ज्ञानमा मात्र सीमित नभएर विद्यार्थीहरूले दैनिक जीवनमा उपयोगी हुने र वैज्ञानिक सोच झल्काउने यस्ता उत्कृष्ट सामग्रीहरू निर्माण गर्नु गौरवको विषय हो ।नगरपालिकाले आगामी दिनमा पनि विद्यार्थीहरूको यस्तो प्रतिभालाई प्रोत्साहन गर्न र विद्यालयहरूको शैक्षिक गुणस्तर सुधार्न आवश्यक बजेट तथा कार्यक्रम ल्याउन कुनै कसर बाँकी राख्ने छैन ।“यस्तै, प्रमुख प्रशासकीय अधिकृत हरिदत्त कँडेलले शिक्षालाई प्रविधिसँग जोड्नु आजको आवश्यकता रहेको औँल्याउनुभयो । कँडेलले भन्नुभयो, “गोठमा भएका रैथाने प्रविधिदेखि आधुनिक विज्ञानका अवधारणालाई विद्यार्थीहरूले जसरी प्रदर्शनीमा उतारेका छन्, यसले हाम्रो शिक्षण सिकाइ पद्धति सही दिशामा अघि बढिरहेको सङ्केत गर्छ ।

सिकाइलाई रमाइलो र प्रयोगात्मक बनाउन यो प्रदर्शनी निकै फलदायी देखिएको छ ।“कार्यक्रमको उद्देश्य र प्रभावकारिताबारे प्रस्ट पार्दै वरिष्ठ शिक्षा अधिकृत प्रकाशदत्त भट्टले भन्नुभयो, “हामीले विद्यार्थीहरूमा लुकेर रहेको सिर्जनात्मक क्षमता बाहिर ल्याउन र एक–अर्काको विद्यालयको सिकाउने शैली आदानप्रदान होस् भनेर यो पालिका स्तरीय प्रदर्शनी आयोजना गरेका हौँ । विद्यार्थीहरूको यो उत्साहले हामीलाई भविष्यमा यस्ता कार्यक्रमहरूलाई अझ परिष्कृत रूपमा निरन्तरता दिन ऊर्जा मिलेको छ ।“त्यसै गरी, सहायक शिक्षा अधिकृत कृष्णप्रसाद लम्साल र स्रोत व्यक्ति मेघनाथ कोइरालाले पनि विद्यार्थीहरूको लगनशीलता र शिक्षकहरूको मार्गदर्शनको सराहना गर्दै प्रदर्शनीले नगरपालिकाको समग्र शैक्षिक विकासमा एउटा नयाँ इँटा थपेको धारणा राख्नुभएको थियो ।

प्रदर्शनीमा सहभागी विद्यार्थीहरूले आफूले निर्माण गरेका सामग्रीहरूका बारेमा अवलोकनकर्ताहरूलाई विस्तृत जानकारी गराएका थिए । सहभागी एक विद्यार्थीले आफ्नो अनुभव सुनाउँदै भनिन्, “हामीले कक्षाकोठामा पढेका कुराहरूलाई यसरी आफैँले सामग्री बनाएर प्रदर्शन गर्न पाउँदा निकै खुसी लागेको छ । यसले हाम्रो आत्मविश्वास अझ बढाएको छ ।“नगरपालिका भित्रका मावि स्तरीय विद्यालयहरूबीच सकारात्मक प्रतिस्पर्धाको वातावरण सिर्जना गरेको यस प्रदर्शनीलाई स्थानीय बुद्धिजीवी र अभिभावकहरूले समेत निकै सकारात्मक कदमका रूपमा लिएका छन् ।