धादिङ प्रशासनद्वारा दुई दिन अत्यावश्यक बाहेकका सेवा बन्द

धादिङ, १७ फागुन ।

जिल्ला प्रशासन कार्यालय धादिङले प्रतिनिधि सभा सदस्य निर्वाचन–२०८२ सम्पन्न गर्न कर्मचारी खटनपटनका कारण दुई दिन अत्यावश्यक बाहेकका सबै सेवा बन्द रहने जनाएको छ।

कार्यालयले आइतबार सूचना जारी गर्दै प्रतिनिधि सभा सदस्य निर्वाचनका लागि कर्मचारीहरू विभिन्न मतदान केन्द्रमा खटिइरहेकाले जनशक्ति अभाव हुने जानकारी दिएको हो। सोही कारण मिति २०८२ फागुन १८ गतेदेखि १९ गतेसम्म शान्ति–सुरक्षा र विपद् सम्बन्धी कार्य बाहेक अन्य सम्पूर्ण सेवा स्थगित गरिने जनाइएको छ।

सेवाग्राहीहरूलाई पर्न सक्ने असुविधाप्रति क्षमायाचना गर्दै कार्यालयले अत्यावश्यक कामबाहेकका सेवाका लागि तोकिएको मितिपछि मात्र कार्यालयमा सम्पर्क गर्न अनुरोध गरेको छ।

प्रशासकीय अधिकृत राममणी मिश्रद्वारा हस्ताक्षरित उक्त सूचनामा निर्वाचन कार्य सफल बनाउन कर्मचारी व्यवस्थापन प्राथमिकतामा राखिएको उल्लेख गरिएको छ।