नेशनल प्याब्सन धादिङद्वारा आयोजित हाजिरीजवाफ प्रतियोगिता सम्पन्न

धादिङ, माघ २३ गते ।
नेशनल प्याब्सन धादिङको आयोजनामा प्राथमिक तहका विद्यार्थी लक्षित जिल्ला स्तरीय हाजिरीजवाफ प्रतियोगिता सम्पन्न भएको छ । प्रतियोगितामा नेशनल प्याब्सन धादिङमा आबद्ध १० वटा विद्यालयका विद्यार्थीहरूको सहभागिता रहेको थियो।

प्रतियोगितामा धादिङ बोर्डिङ स्कुलले प्रथम स्थान हासिल गरेको छ। त्यसैगरी, न्यु किवो बोर्डिङ स्कुल द्वितीय, नेचर स्माइल एकेडेमी तृतीय तथा न्यु धादिङ बोर्डिङ स्कुल सान्त्वना भएको छ ।

प्रतियोगितामा प्रथम, द्वितीय, तृतीय तथा सान्त्वना स्थान हासिल गर्ने विद्यार्थीहरूलाई मेडल र प्रमाणपत्र प्रदान गरिएको छ भने सम्बन्धित विद्यालयहरूलाई ट्रफी तथा प्रमाणपत्र प्रदान गरिएको छ।

नेशनल प्याब्सन धादिङका अध्यक्ष प्रयास रेग्मीको अध्यक्षतामा सम्पन्न भएको कार्यक्रममा नेशनल प्याब्सन केन्द्रीय समितिका सदस्य काशीनाथ कोइरालाको प्रमुख आतिथ्यता रहेको थियो । प्रतियोगिताको सञ्चालन (क्विज मास्टर) चेतनारायण श्रेष्ठले गर्नुभएको थियो।

कार्यक्रमका सभापति तथा नेशनल प्याब्सन धादिङका अध्यक्ष प्रयास रेग्मीले विद्यार्थीहरूको सर्वाङ्गीण विकासका लागि यस्ता शैक्षिक तथा सिर्जनात्मक कार्यक्रमहरू आवश्यक रहेको बताउनुभयो । उहाँले आगामी दिनहरूमा पनि निरन्तर यस्ता कार्यक्रम आयोजना गरिने जानकारी दिनुभयो। साथै सबै विद्यालयलाई सक्रिय सहभागिताका लागि आग्रह समेत गर्नुभएको छ ।