बैदेशिक रोजगार सम्बन्धी मुद्दा जिल्लामै हेर्न कानुनी संशोधन आवश्यक : नगर प्रमुख ढुंगाना

धादिङ, पुस ३० गते ।
नीलकण्ठ नगरपालिकाका नगर प्रमुख तथा नेपाल नगरपालिका संघका अध्यक्ष भीम प्रसाद ढुंगानाले बैदेशिक रोजगार सम्बन्धी ठगीका मुद्दा जिल्लामै हेर्न सक्ने गरी कानुनी संशोधन गर्नुपर्ने आवश्यकता औँल्याउनुभएको छ ।

नीलकण्ठ नगरपालिकाको आयोजनामा जिल्ला स्तरमा आयोजित सुरक्षित बैदेशिक रोजगार तथा बैदेशिक रोजगार ठगी सम्बन्धी अन्तरक्रिया तथा अभिमुखीकरण कार्यक्रममा बोल्दै नगर प्रमुख ढुंगानाले हालको कानुनी व्यवस्थाका कारण नागरिकहरूले अत्यधिक दुःख पाउनुपरेको बताउनुभयो ।

थोरै पैसाको ठगीमा समेत मुद्दा दायर गर्न काठमाडौँ जानुपर्ने बाध्यताले पीडितहरू थप समस्यामा परेको उहाँको भनाइ थियो । “बैदेशिक रोजगारसँग सम्बन्धित ठगीका घटनाहरू बढिरहेका छन् । यसलाई न्यूनीकरण गर्न जिल्लामै मुद्दा दर्ता र सुनुवाइ हुने कानुनी व्यवस्था आवश्यक छ,” उहाँले भन्नुभयो, “नागरिकहरूले न्याय पाउन सजिलो हुने वातावरण सिर्जना गर्न अब ढिलाइ गर्नु हुँदैन ।”

नगर प्रमुख ढुंगानाले बैदेशिक रोजगारमा जाने क्रममा तथा विदेशमा रहँदा नेपाली नागरिकहरूले अनेक समस्या खेप्नुपरेको उल्लेख गर्दै यसको समाधानका लागि संघ, प्रदेश र स्थानीय तह—तीनै तहका सरकारले विशेष प्राथमिकताका साथ काम गर्नुपर्नेमा जोड दिनुभयो ।

यसैगरी कार्यक्रममा जिल्ला न्यायाधिस मनकुमारी जिएम विकले बैदेशिक रोजगार सम्बन्धी मुद्दामा कानुन दिएको अधिकार प्रयोग गरेर न्युनीकण गर्नुपर्ने बताउनभयो । बैदेशिक रोजगारको ठगी सम्बन्धी मुद्दामा सबै पक्षका सरोकारवालाहरु मिलेर अघि बढ्नुपर्ने बताउनुभयो ।

यसैगरी कार्यक्रममा विशेष अतिथी नगर उप प्रमुख दिपक विश्वकर्माले बैदेशिक रोजगारको ठगीमा कानुनी प्रक्रिया झन्झटिलो हुदा जनताहरुले दुख पाईरहेको बताउनुभयो । राज्य गम्भिर भएर लाग्नुपर्ने बेलामा बेदेशिक रोजगारको मुद्दाहरुमा सरकार गम्भिर नभएको आभास भएको बताउनुभयो।

नीलकण्ठ नगरपालिकाका मेयर तथा नेपाल नगर पालिकास संघका अध्यक्ष भीम प्रसाद ढुंगानाको अध्यक्षतामा सम्पन्न भएको कार्यक्रममा जिल्ला न्यायाधिस मनकुमारी जिएम विकको प्रमुख आतिथ्यता रहेको थियो ।

नीलकण्ठ नगरपालिकाका उप मेयर दिपक विश्वकर्माको विशेष आतिथ्यतामा सम्पन्न भएको कार्यक्रममा नीलकण्ठ नगरपालिकाका प्रमुख प्रशासकीय अधिकृत हरिदत्त कंडेल, जिल्ला न्यायाधिवक्त खेमराज काफ्ले, श्रेस्तेदार राजेन्द्र लुईटेल, जिल्ला प्रशासन कार्यालयका प्रशासकीय अधिकृत राममणी मिश्र, सामी कार्यक्रम प्रदेश संयोजक पुरुषोत्तम अधिकारी, जिल्ला प्रहरी कार्यालय, शसस्त्र प्रहरी कार्यालय, बार एसोसियसन लगायत सरोकारवाला निकायका प्रमुख एवं प्रतिनिधिहरुको आतिथ्यता रहेको थियो । कार्यक्रममा हेल्भेटासका प्रदेश कार्यक्रम संयोजक पुरुषोत्तम अधिकारीले बैदेशिक रोजगारको वर्तमान अवस्था, चुनौती र समस्याहरुको बारेमा सहजिकरण गर्नुभएको थियो ।

यसैगरी सामी कार्यक्रम जिल्ला समंयोजक दिनेश दुवाडीले बैदेशिक रोजगारको धादिङको अवस्था, ठगीको घट्नाको अवस्था र आप्रवासी स्रोत केन्द्रले गरेको कामहरु र ठगीका मुद्दामा जिल्ला प्रशासन कार्यालय र जिल्ला प्रहरी कार्यालयसँगको समन्वयको विषयमा सहजिकरण गर्नुभएको थियो ।

कार्यक्रममा सहभागी सरोकारवालाहरूले पनि बैदेशिक रोजगारलाई सुरक्षित, मर्यादित र ठगीमुक्त बनाउन कानुनी सुधार, प्रभावकारी अनुगमन र नागरिक सचेतना अभिवृद्धि आवश्यक रहेको धारणा राखेका थिए ।