देशलाई संकटबाट तार्ने उपाय निर्वाचन नै हो : प्रचण्ड

धादिङबेशी । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्प कमल दाहालले प्रचण्डले देश अहिले गम्भीर र अपठ्यारो स्थितिमा रहेकोले उत्तम उपाय नै निर्वाचन नै भएको बताउनु भएको छ । बुधबार धादिङको बेनिघाट रोराङ गाउँपालिकाको प्रशासकीय भवन उद्घाटन गर्दै उहाँले सो कुरा बताउनु भएको हो ।

गाउँपालकिाको नयाँ भवन उद्घाटन गर्दै पूर्व प्रधानमन्त्री दाहालले सङ्घीय संरचना बलियो बनाउन स्थानीय तहको भूमिकालाई थप मजबुत बनाउनु आजको आवश्यकता भएको बताउनु भयो । आफ्नो संवोधनका क्रममा दाहालले ग्रामीण विकासको आधारभूत केन्द्र नै स्थानीय सरकार हुने टिप्पणी गर्नु भयो ।

पूर्वप्रधानमन्त्री ‘प्रचण्ड’ले हालको परिस्थितिबाट राष्ट्रलाई निकास दिन सबै नेपालीले एकताको बल पुनः सुदृढ गर्नुपर्ने आवश्यकता रहेको बताउनु भयो । उहाँले दस वटा पार्टीबिच गरिएको एकतालाई चुनाव जित्ने मात्र उद्देश्य नभई “राष्ट्र बचाउने महाअभियानको सुरुवात”को रूपमा रहेको बताउनुभयो । उहाँले भन्नुभयोे, “नेपाली कम्युनिष्ट पार्टीलाई अझ बलियो बनाउँदैछौँ । निर्वाचन हुन्छ, हुनै पर्छ । अहिलेको अन्योल, अराजकता र भयको वातावरणको अन्त्यको मूल उपाय पनि यही हो ।

पूर्वप्रधानमन्त्री दाहालले व्यक्तिगत रूपमा पुनः प्रधानमन्त्री बन्ने चाहना नभएतापनि देशले आवश्यकता देखायो र जनताले चाहे भने आफू जिम्मेवारीबाट पछि नहट्ने धारणा राख्नु भयो ।
निर्वाचनको वातावरण निर्माण गर्न सबै तह–तप्काले आ–आफ्नो स्थानबाट योगदान पु¥याउनुपर्ने उल्लेख गर्दै उहाँले राष्ट्रिय एकता मजबुत बनाउन सके राष्ट्र अझ शक्तिशाली र सक्षम बन्ने विश्वास व्यक्त    गर्नुभयो ।

त्यसैगरी, उहाँले आफू जुनसुकै भूमिकामा रहे पनि बुढीगण्डकी जलविद्युत् आयोजनालाई अगाडि बढाउन निरन्तर प्रयास गर्ने प्रतिबद्धता समेत व्यक्त गर्नुभयो । उहाँले बेनीघाट रोराङ गाउँपालिकाले लिजा तथा बेरुजुमा गरेकोे उत्कृष्टताको सधै, सवै ठाउँमा प्रशंसा गर्ने गरेको बताउनु भएको थियो ।

बेनीघाट रोराङ गाउँपालिकाले करिब १४ करोड रुपैयाँ लागतमा नयाँ प्रशासकीय बहु–उपयोगी भवन निर्माण गरेको छ । यस नयाँ संरचनाले गाउँपालिकाबाट प्रदान हुने सेवा–प्रवाहलाई अझ सहज र प्रभावकारी बनाउने अपेक्षा गरिएको छ ।

१३ करोड ९० लाख रुपैयाँ लागतमा बनेको ३८ कोठे भवनमा तीनवटा तला रहेको छ । पहिलो तला सामान्य प्रशासनिक सेवा, दोस्रो तला उप–प्रमुखको कार्यकक्ष र न्यायिक इजलास र तेस्रो तला पालिकाका प्रमुखको कार्यकक्ष रहेको छ । यसअघि गाउँपालिकाले सहकारीको भवन भाडामा लिएर सेवा प्रदान गर्दै आएको थियो । नयाँ भवनले अब आधुनिक, व्यवस्थित र नागरिकमैत्री प्रशासनिक सेवा सुनिश्चित गर्ने तयारी गरेको गाउँपालिकाले जनाएको छ ।

गाउँपालिका अध्यक्ष कृष्णबहादुर थपलियाको अध्यक्षतामा सम्पन्न उक्त कार्यक्रममा पूर्व मन्त्री राजेन्द्रप्रसाद पाण्डे, पूर्वमन्त्री डा. गंगालाल तुलाधर, संविधानसभा सदस्य पुष्प विक्रम मल्ल लगायत स्थानीय जनप्रतिनिधि, कर्मचारी तथा नागरिकको उल्लेख्य उपस्थिति रहेको थियो ।