बेनीघाट रोराङमा शैक्षिक सम्मान समारोह सम्पन्न

धादिङ, ५ असोज ।

बेनीघाट रोराङ गाउँपालिकाल संविधान दिवस तथा राष्ट्रिय शिक्षा दिवस २०८२ को अवसरमा शैक्षिक सम्मान समारोह सम्पन्न गरेको छ । कार्यक्रममा गाउँपालिकाले ३४० जना शिक्षक, ४७ जना विद्यार्थी र ५४ विद्यालयलाई सम्मान गरेको हो ।

कार्यक्रममा कक्षा ५, ८, १० र १२ मा उत्कृष्ट नतिजा ल्याएका विद्यार्थी, विषयगत शिक्षक तथा विद्यालयलाई ‘बेनीघाट रोराङ शिक्षा पुरस्कार’ प्रदान गरिएको थियो । साथै, यसै वर्ष स्थापना गरिएको ‘सहिद इन्द्रबहादुर थपलिया रोराङ शिक्षा पुरस्कार’ बाट ९ जना उत्कृष्ट शिक्षकलाई विशेष सम्मान गरिएको हो ।

गाउँपालिकाले उत्कृष्ट कर्मचारीका रुपमा शिक्षा अधिकृत बोधराज पाठक, जिन्सी शाखा प्रमुख सुमन अधिकारी तथा प्रशासन शाखा प्रमुख परशुराम घिमिरेलाई समेत सम्मनान गरेको थियो ।

विद्यालयहरूको संस्थागत स्वः तथा बाह्य मूल्याङ्कनका आधारमा तहगत रूपमा उत्कृष्ट ठहरिएका ९ विद्यालय पनि सम्मानित भएका छन् । कार्यक्रममा विभिन्न विद्यालयका शिक्षक र विद्यार्थीहरूले सांस्कृतिक कार्यक्रम तथा रोचक प्रस्तुतिहरू प्रस्तुत गरेका थिए ।