पारिजात संरक्षण र पर्यटन आकर्षण गर्न डिभिजन वन कार्यालय धादिङको पहल

धादिङ,१२ असार
जिल्लामा जैविक विविधता तथा औषधीय महत्व बोकेको लोपोन्मुख बिरुवा “पारिजात“ को संरक्षणमा डिभिजन वन कार्यालय धादिङले विशेष ध्यान दिएको छ ।बेनीघाट रोराङ गाउँपालिका–१० स्थित जवाङ मौवा खोला सामुदायिक वन क्षेत्रमा दशौं हजार पारिजातका बिरुवाहरू फेला परेका छन्, जसको संरक्षण तथा प्रवद्र्धन कार्य तीव्र रुपमा अगाडि बढाइएको छ।वन कार्यालयका अनुसार चालु आर्थिक वर्षमा करिब १ लाख रुपैयाँको बजेटमा १.८ हेक्टर कोर क्षेत्र र वरपरको ५ हेक्टर पेरिफेरी क्षेत्रमा पारिजात संरक्षणको काम भइरहेको छ ।

आगामि आर्थिक वर्षमा भने सोही सामुदायिक वनको तीन वटा ब्लकमा करिब २० हेक्टर क्षेत्रमा व्यवस्थित रुपमा पारिजात बन विस्तार गर्ने योजना बनाइएको छ ।डिभिजनल वन अधिकृत विष्णु प्रसाद आचार्यका अनुसार, आगामी वर्षको लागि २० लाख रुपैयाँ बजेट विनियोजन भइसकेको छ। यस अन्तर्गत सो क्षेत्रलाई नेपालकै उत्कृष्ट पर्यटकीय गन्तव्य र अध्ययन केन्द्रको रुपमा विकास गरिने लक्ष्य राखिएको छ ।
स्थानीय तहको पनि संरक्षणमा उल्लेख्य योगदान रहने अपेक्षा गरिएको छ।बेनीघाट रोराङ गाउँपालिकाले पनि आफ्नो तर्फबाट आवश्यक सहयोग गर्ने प्रतिबद्धता जनाएको छ । पारिजातको महत्व बुझाउन र जनचेतना फैलाउन वन कार्यालयले बृहत् “पारिजात साहित्यिक महोत्सव” आयोजना गर्ने तयारी गरेको छ।

अधिकृत आचार्यले स्थानीयहरूद्वारा पारिजातको घाँसदाउरा प्रयोजनमा अत्यधिक उपयोग भइरहेको बताउँदै, अबदेखि यसलाई पूर्णरूपमा रोक लगाउने निर्णय गरिएको जानकारी दिनुभयो ।यदि यो योजनाबद्ध ढंगले सफल भयो भने धादिङ जिल्लामा पर्यटकीय गन्तव्यको नयाँ पहिचान स्थापित हुने विश्वास लिइएको छ। यस पहलले जैविक संरक्षणसँगै धादिङको पर्यटकीय सम्भावनालाई उजागर गर्नेछ।