नीलकण्ठ नगरपालिकाको सामी कार्यक्रम प्रभावकारी बन्दै : जिल्ला प्रशासनसँग समन्वय बैठक सम्पन्न

धादिङ,१९ असार
नीलकण्ठ नगरपालिकाले सञ्चालन गर्दै आएको सुरक्षित आप्रवासन (सामी) कार्यक्रमलाई अझ प्रभावकारी, समन्वयात्मक र नागरिकमैत्री बनाउने उद्देश्यले जिल्ला प्रशासन कार्यालय धादिङसँग समन्वय बैठक सम्पन्न गरेको छ।नीलकण्ठ नगरपालिकाका प्रमुख प्रशासकीय अधिकृत हरिदत्त कँडेलको अध्यक्षतामा सम्पन्न बैठकमा प्रमुख जिल्ला अधिकारी लक्ष्मी पाण्डेय (गौतम), सहायक प्रमुख जिल्ला अधिकारी ओमप्रसाद भट्टराई, कार्यपालिका सदस्य तथा सामाजिक विकास समितिका संयोजक मञ्जु मगर, सामी कार्यक्रम कार्यान्वयन साझेदार हेल्भेटासका कार्यक्रम अधिकृत भोजराज सुनुवार, नगरपालिकाका शाखा प्रमुखहरू तथा विभिन्न सरोकारवाला निकायका प्रतिनिधिहरूको सहभागिता रहेको थियो।

बैठकमा सामी कार्यक्रमका संयोजक तथा अधिवक्ता दिनेश दुवाडीले कार्यक्रमको हालसम्मको कार्यप्रगति, उपलब्धि तथा आगामी योजनाबारे विस्तृत जानकारी प्रस्तुत गर्नुभएको थियो। सामी कार्यक्रमले वैदेशिक रोजगारीमा जाने इच्छुक युवाहरूलाई सुरक्षित, व्यवस्थित र सूचनामा आधारित निर्णय लिन सहयोग पुग्ने गरी विभिन्न सेवा तथा कार्यक्रम सञ्चालन गर्दै आएको छ।कार्यक्रम अन्तर्गत वैदेशिक रोजगारसम्बन्धी सही सूचना तथा परामर्श सेवा, कानुनी सहायता र न्यायमा पहुँच, मनोसामाजिक परामर्श, वित्तीय साक्षरता अभिवृद्धि, सुरक्षित वैदेशिक रोजगारसम्बन्धी जनचेतनामूलक कार्यक्रम तथा आवश्यक समन्वयात्मक सेवाहरू नियमित रूपमा सञ्चालन भइरहेका छन्। यी सेवाले वैदेशिक रोजगारमा जानुअघि आवश्यक जानकारी प्राप्त गर्न, ठगी तथा जोखिमबाट बच्न र विदेशबाट फर्किएपछि पुनःस्थापनामा समेत सहयोग पुग्ने नीलकण्ठ नगरपालिकाका प्रमुख प्रशासकीय अधिकृत हरिदत्त कंडेलले जानकारी दिनुभयो ।

बैठकमा सहभागीहरूले सुरक्षित आप्रवासनका क्षेत्रमा स्थानीय तह, जिल्ला प्रशासन कार्यालय तथा अन्य सरोकारवाला निकायबीचको समन्वयलाई थप सुदृढ बनाउँदै सेवा प्रवाहलाई प्रभावकारी बनाउने विषयमा छलफल भएको थियो। सहभागीहरूले वैदेशिक रोजगारका क्रममा हुने ठगी, शोषण तथा विभिन्न समस्यालाई न्यूनीकरण गर्न सबै निकायबीच सहकार्य आवश्यक रहेकोमा जोड दिनुभएको थियो ।प्रमुख जिल्ला अधिकारी लक्ष्मी पाण्डेय (गौतम)ले सामी कार्यक्रमले सञ्चालन गरिरहेका गतिविधि अत्यन्तै सकारात्मक र नागरिकको प्रत्यक्ष हितसँग जोडिएका रहेको बताउनुभयो। उहाँले सुरक्षित वैदेशिक रोजगार सुनिश्चित गर्न सूचना, परामर्श, कानुनी सहायता तथा मनोसामाजिक सहयोग जस्ता सेवाहरू प्रभावकारी रहेको उल्लेख गर्दै नीलकण्ठ नगरपालिकाले कार्यक्रममार्फत गरिरहेको कार्य उदाहरणीय रहेको धारणा व्यक्त गर्नुभयो।

बैठकले आगामी दिनमा सामी कार्यक्रमलाई अझ प्रभावकारी बनाउँदै स्थानीय तह, जिल्ला प्रशासन कार्यालय तथा सम्बन्धित निकायबीच निरन्तर समन्वय र सहकार्यलाई सुदृढ गर्ने विषयमा छलफल भएको साथै । साथै, वैदेशिक रोजगारमा जाने युवाहरूलाई सुरक्षित, मर्यादित र सूचनामा आधारित सेवा उपलब्ध गराउन संयुक्त प्रयासलाई निरन्तरता दिने निष्कर्ष निकालिएको छ।