नीलकण्ठ नगरपालिका भित्रका एक हजार ९ सय ९९ विद्यार्थीहरुलाई शैक्षिक सामाग्री वितरण

धादिङ,०१ चैत्र ।
नीलकण्ठ नगरपालिका भित्रका एक हजार ९ सय ९९ जना विद्यार्थीहरुलाई शैक्षिक सामाग्री वितरण गरिएको छ । नगरपालिकाभित्र रहेका १२ वटा विद्यालयका विद्यार्थीहरूलाई झोलासहित न्यानो कपडा सेट र स्टेसनरी सामग्री वितरण गरिएको हो।

नीलकण्ठ नगरपालिकाका नगर उप–प्रमुख दीपक विश्वकर्माको पहलमा ग्लोबल कोअपरेसन फर डेभलपमेन्ट र चाइना फाउन्डेसन फर रुलर डेभलपमेन्टको सहयोगमा ४३ लाख १४ हजार ९४१ रुपैयाँ बराबरको सामग्री वितरण गरिएको हो।

उपप्रमुख विश्वकर्माका अनुसार केही विद्यालयमा झोला, केहीमा शैक्षिक सामग्री तथा स्टेसनरी वितरण गरिएको छ भने केही विद्यालयका विद्यार्थीहरूलाई न्यानो कपडासमेत वितरण गरिएको छ। नगरपालिकाले निःशुल्क र अनिवार्य मात्र होइन, गुणस्तरीय शिक्षामा विशेष जोड दिएको उहाँले बताउनुभयाो ।

उहाँले भन्नुभयो, “नगरपालिकाभित्रका सबै विद्यार्थीहरू आर्थिक रूपमा सक्षम नहुन सक्छन्, त्यसैले प्रदान गरिएको शैक्षिक सामग्री तथा लत्ताकपडाले उनीहरूको शैक्षिक सुधारमा महत्वपूर्ण योगदान पुग्ने विश्वास लिएको छ।’

यस अभियानमा जनवादी गणतन्त्र चीनका लागि निवर्तमान नेपाली राजदूत एवं नेकपा माओवादी केन्द्रका स्थायी समिति सदस्य विष्णुपुकार श्रेष्ठको समेत सहयोग रहेको उपप्रमुख विश्वकर्माले जानकारी दिनुभयो । यो प्रक्रिया पूरा गर्न दुई वर्ष लागेको र अहिले आएर वितरण गर्न सफल भएकोमा उहाँले खुसी व्यक्त गर्नुभयो ।