राजमार्ग क्षेत्रको होटलको गुणस्तर सुधारको आवश्यकता छः मेयर ढुंगाना

धादिङ,१२ जेठ
होटल व्यवसायीले मर्यादित भएर काम गरे स्थानीय सरकारले सहयोग गर्ने नीलकण्ठ नगरपालिकाका नगर प्रमुख भीम प्रसाद ढुंगानाले बताउनुभयो । होटल व्यवसायीहरुले दर्ता गरेर कानुनी प्रक्रिया पुरा गरेर काम गरे होटल व्यवसायीहरुको हकहितको लागि स्थानीय सरकारले काम गर्ने स्पष्ट पार्नुभएको छ । होटल व्यवसायीको विरुद्धमा बेलाबखत नराम्रो खबर आउने गरेको भन्दै उहाँले राजमार्ग क्षेत्रका होटलहरुको गुणस्त सुधार गर्नुपर्ने बताउनुभयो ।

जिल्ला होटल संघको १७ औँ बार्षिक अधिवेशनलाई सम्बोधन गर्नुहुदै उहाँले जिल्लाको नाम राख्ने गरी होटल व्यवसायीले काम गर्नुपर्ने बताउनुभयो । धादिङ जिल्लामा खाना र बस्नको लागि आउने अतिथी तथा यात्रुहरुको मन जित्ने गरी होटल व्यवसाय सन्चालन गर्नको लागि आग्रह गर्नुभयो । सरकारको मापदण्ड अनुसार होटल सन्चालन गर्नुपर्ने बताउनुभयो ।जिल्ला होटल संघ धादिङका अध्यक्ष रामशरण सिलवालको अध्यक्षतामा सम्पन्न भएको कार्यक्रममा नीलकण्ठ नगरपालिकाका नगर प्रमुख भीम प्रसाद ढुंगानाको प्रमुख आतिथ्यता रहेको थियो ।कार्यक्रममा होटल व्यवसायी महामसंघ नेपालका उपाध्यक्ष धना चोख्याल,होटल व्यवसायी महासंघ नेपालका संरक्षक अमृत भुजेल,होटल तथा पर्यटन व्यवसायी संघ बागमती प्रदेशका अध्यक्ष दामोदर नेपाल,सहायक प्रमुख जिल्ला अधिकारी बलराम ढकाल लगायतको विशेष आतिथ्यता रहेको थियो ।

कार्यक्रममा होटल व्यवासयीहरुले अहिले आर्थिक रुपमा होटल व्यवसायी धरासायी बनेको भन्दै सहयोग गर्नको लागि तिनै तहका सरकारलाई आग्रह गरेका थिए । होटल व्यवसायीहरुले घाटामा भएपनि होटल सन्चालन गरेर सेवा दिईरहेको भन्दै अध्यक्ष सिलवालले होटल व्यवसायीहरुको हकहितको लागि लाग्नको लागि पनि सबैलाई आग्रह गर्नुभयो । होटल व्यवसायीहरुको पनि कमिकमजोरी रहेको भन्दै उहाँले आगामी दिनमा यसलाई सुधारेर लैजाने पनि प्रतिबद्धता व्यक्त गर्नुभयो।रातको समयमा पनि होटल व्यवसाय सन्चालन गर्न पाउनुपर्ने व्यवसायीहरुले माग गरेका छन्।