जिल्लाकै धार्मिक तथा पर्यटकीय स्थल सिद्धबाबा मन्दिरमा खानेपानीको काम हुँदै

धादिङ,१२ साउन ।
धादिङ जिल्लाकै धार्मिक तथा पर्यटकीय स्थल सिद्धबाबा मन्दिरमा खानेपानी पुर्याउने काम अन्तिम चरणमा पुगेको छ । सिद्धलेक गाउँपालिका वडा नम्बर २ स्थित सुकुम्बासी टोलको टिमुरेधाराबाट पानी तानेर सिद्धबाबा मन्दिरमा शुद्ध खानेपानी पु्र्याउने काम अन्तिम चरणमा पुगेको वडा नम्बर २ का वडा अध्यक्ष शम्भु गुरुङ(सागर)ले जानकारी दिनुभयो ।

प्रसिद्ध धार्मिक एवमं पर्यटकीय स्थल सिद्धबाबा मन्दिरमा खानेपानीको समस्या हुँदा त्यस क्षेत्रमा जाने भक्तजनहरुले सास्ती खेप्दै आएका थिए ।संघीय बजेट १० लाखबाट लिफ्टिीङ खानेपानीको काम सुरु गरीएको हो । ढेवा डाँडामा १० हजार लिटरको ट्यांकी निर्माण गरी मन्दिर वरपर ६ वटा धारो निर्माण भएको स्थानीय समाजसेवी अमृत गुरुङ(तिलक)ले जानकारी दिनुभयो ।भक्तजनहरु हिड्ने पैदल मार्गको वरपर पनि खानेपानीको धारो निर्माण गरीएको तिलकले जानकारी दिनुदभयो । सिद्धलेक गाउँपालिका वडा नम्बर २ का वडा अध्यक्ष शभ्भु गुरुङ,स्थानीय समाजसेवी अमृत गुरुङ,सिद्धलेक ढेवाडाँडा समाजका अध्यक्ष दिल नारायण श्रेष्ठ र स्थानीय धन नारायण श्रेष्ठले बिहिबार उक्त खानेपानी आयोजनाको अनुगमन गर्नुभएको थियो ।

चरम खानेपानीको समस्या रहेको उक्त स्थानमा खानेपानीको काम भईरहेको गाँउपालिका अध्यक्ष परशुराम खतिवडाले जानकारी दिनुभयो।गाउँपालिकाले निर्माण गरेको डिपिआर अनुसार काम गर्ने लक्ष्य रहेको भन्दै खतिवडाले त्यस क्षेत्रको आवश्यकताको आधारमा गाउँपालिकाले काम गर्ने स्पष्ट पार्नुभयो ।गाउँपालिका भित्रको धार्मिक तथा पर्यटकीय क्षेत्रहरुको पुनःनिर्माण लगायत त्यस क्षेत्रसम्म जाने मोटरबाटो,खानेपानी,र बिजुली पुर्याउने कामलाई पनि पहिलो प्राथमिकता दिएर काम गर्ने बताउनुभयो । सिद्धबाबा मन्दिरमा बिजुली पुर्याउनको लागि प्रक्रिया सुरु भएको भन्दै खतिवडाले बनभोज स्थल र पार्कीङ स्थललाई व्यस्थित बनाउने काम यस आर्थिक बर्षबाट सुरु गरिने बताउनुभयो । सिद्धबाबा मन्दिरमा नियमित पुजा गर्ने र एक जना हेरालुको आवश्यकता रहेको स्थानीय समाजसेवी अमृत गुरुङ(तिलक)ले जानकारी दिनुभएको छ ।