गजुरी गाउँपालिकामा लोकसेवा तथा शिक्षक सेवा आयोगको तयारी कक्षा संचालन

धादिङ,०४ बैशाख ।
गजुरी गाउँपालिकाले सरकारी सेवाप्रती आर्कषण बढाउन लोकसेवा तथा शिक्षक सेवा आयोगको तयारी कक्षा संचालनमा ल्याएको छ । गजुरी गाउँपालिकाको आयोजना तथा आर्दश बहुमुखी क्याम्पसको व्यवस्थापनमा लोकसेवा तथा शिक्षक सेवा आयोगको तयारी कक्षा संचालनमा आएको हो।

गजुरी गाउँपालिका लगायत समग्र धादिङ जिल्लाकै हकमा निजामति सेवामा अत्यन्तै न्युन जनशक्ति रहेकोले लोकसेवा तथा शिक्षक सेवा जस्ता प्रतिस्पर्धात्मक सेवामा स्थानिय युवा वर्गको आर्कषण बढाउन कक्षा संचालन गरिएको गाउँपालिकाका अध्यक्ष गणेशलाल श्रेष्ठले बताउनुभयो ।

गजुरीमै कक्षा संचालन भएपछि विद्यार्थीहरुलाई कक्षा लिनको लागि काठमाडौँसम्म जानु पर्ने बाध्यता हटेको श्रेष्ठले बताउनुभयो ।
संघीय निजामती सेवाको ना सु तथा खरिदार तयारी कक्षा रहेको छ भने प्रदेश र स्थानी तहको हकमा सहायक चौँथो र पाँचौतहको तयारी कक्षा तथा शिक्षक सेवा आयोगको हकमा प्रा वि तहका तयारी कक्षा सन्चालनमा रहेको गाउँपालिकाका अध्यक्ष गणेशलाल श्रेष्ठले बताउनुभयो ।

तयारी कक्षामा १२ सकेर बसेका विद्यार्थी तथा ब्याचलर पढ्दै गरेका र सरकारी विद्यालयमा अध्यापन गराइ रहेका अस्थाइ करारका शिक्षकहरु सहभागी हुन सक्नेछन् । कक्षा बेलुका ५ बजेदेखि १ घण्टा संचालन हुने छ।

युवा वर्ग लक्षित कार्यक्रम भएकोले सम्पुर्णलाई तयारी कक्षामा सहभागी हुन श्रेष्ठले आग्रह गर्नुभएको छ । विद्यार्थीहरुको माग र सहभागिता अनुसार पछि अन्य सेवा तथा कक्षाहरु संचालन गरिने अध्यक्ष श्रेष्ठको भनाई छ ।