धादिङमा म्यादी प्रहरीका लागि २६ सयको आवेदन,तन्दुरुस्ती परीक्षा आजदेखि

धादिङ,०९ असोज ।
म्यादी प्रहरीका लागि धादिङमा २६ सय बढिको आवेदन परेको छ । आगामी ४ मंसिरमा हुन लागेको प्रतिनिधि सभा र प्रदेश सभा निर्वाचनमा खटाउनका लागि सरकारले म्यादी प्रहरी भर्ना गर्दै छ । धादिङमा दुई हजार ६०९ जनाले आवेदन दिएका हुन्।

भदौ ३० गतेदेखी असोज ६ गते आठ दिनको अवधीमा १ हजार ७१७ पुरुष र ८९२ महिला गरी जम्मा दुई हजार ६०९ जनाले म्यादी प्रहरीका लागि आवेदन दिएको जिल्ला प्रहरी कार्यालय धादिङका प्रवक्ता(डिएसपी) श्याम बहादुर खत्रिले जानकारी दिनुभयो ।

धादिङको लागि प्रहरी प्रधान कार्यालयले म्यादी प्रहरीको कोटा भने नखुलाएको तर १५ सय देखी १७ सयको हाराहारी छनोट गरिने डिएसपी खत्रिले बताउनुभयो । गत वैशाखमा भएको स्थानीय तहको निर्वाचनमा जिल्लामा एक हजार ४१५ म्यादी प्रहरी भर्ना गरिएको थियो । स्थानीय तहको निर्वाचनमा छनोट भएका ९ सयजनाले अहिले पनि आवेदन दिएको डिएसपी खत्रिले बताउनुभयो ।

म्यादीका लागि आवेदन दिएकाको शारीरिक तन्दुरुस्ती परीक्षा आज आइतबार देखि सुरु भएको छ । परीक्षा धादिङबेशी स्थित खुल्ला चौरमा हुने प्रहरी कार्यालयले जानकारी दिएको छ । पूर्व सुरक्षाकर्मी र स्थानीय तहको निर्वाचनका म्यादी प्रहरीले भने तन्दुरुस्ती परीक्षा दिनु नपर्ने कार्यालयले जनाएको छ । उनीहरुको हकमा उही असोज १४ गते अन्र्तवार्ता हुने बताइएको छ ।

अन्यको हकमा आजदेखी सुरु भएको प्रारम्भिक स्वास्थ्य परिक्षण, वेयरिङ चेक र शारीरिक तन्दुरुस्तीको नतिजा १२ गते प्रकाशन गरिने, १२ गते लिखित परिक्षा लिईने र १४ गते अन्र्तवार्ता हुने बताइएको छ । शारिरीक अभ्यास, लिखित परीक्षा र अन्तरवार्ता लगायतमा पास भई निर्धारित मापदण्ड पुरा गरेका आवेदकलाई म्यादी प्रहरीमा छनौट गरिने जिल्ला प्रहरी कार्यालय धादिङका प्रवक्ता(डिएसपी) खत्रिले बताउनुभएको छ ।

निर्वाचन सुरक्षाका लागि सरकारले देशभरबाट एक लाख १५ हजार म्यादी प्रहरी भर्ना गर्दै छ । आवेदन दिएकालाई छनौट गर्ने काम असोज ९ गतेदेखि १४ गतेसम्म हुने प्रहरी प्रधान कार्यालयले जनाएको छ ।

छनौटको अन्तिम नतिजा असोज २५ गते प्रकाशित गर्ने कार्यतालिका छ । म्यादीका लागि छनौटमा भएकालाई असोज ३० गतेदेखि कात्तिक ८ गतेसम्म तालिम दिइने छ । म्यादी प्रहरीलाई निर्वाचनमा ४० दिन खटाइने छ ।

म्यादी प्रहरीले प्रतिदिन ८६९ रुपैयाँका दरले ४० दिनको ३४ हजार ७६० रुपैयाँ पारिश्रमिक, खाद्यान्न बापत प्रतिव्यक्ति एकमुष्ट सात हजार २०० रुपैयाँ, पोशाक तथा अन्य सामान खरिद गर्न छ हजार, तयारी खर्च बापत एक हजार र प्रतिदिन ३०० रुपैयाँका दरले ४ दिनको एक हजार २०० रुपैयाँ खाजा खर्च गरी जम्मा ५० हजार १६० रुपैयाँ पाउने छन् ।