आरोप/प्रत्यारोपतिर नलागौं ।

धादिङ,१६ भाद्र ।
नेकपा एमालेका नेता महेश बस्नेतले स्वतन्त्र रुपमा निर्वाचित मेयर तथा केही राजनीतिक नेतृत्वमाथि हातखुट्टा प्रयोग गरेर तह लगाउने बताएपछि पछिल्लो समय महेश बस्नेत विरुद्धमा आवाज चर्कदै गैरहेको छ ।

नेकपा एमालेका नेता बस्नेतले काठमाण्डौका मेयर बालेन्द्र शाह, धरानका मेयर हर्क साङपाङ, रविन्द्र मिश्र तथा रमेश खरेल लगायतका नयाँ राजनीतिक नेतृत्वप्रति कटाक्ष गरेका छन् । जसका कारण आगामी दिनमा नेता बस्नेत विरुद्धमा वा समर्थनमा के कस्ता प्रतिक्रिया आउला त्यो हेर्न बाँकी नै छ ।

हुनतः पछिल्लो समय स्वतन्त्र रुपमा विजयी भएका मेयरहरु आफैं आफैंमा विवाद चर्कदै गैरहेको छ । स्वतन्त्र रुपमा विजयी मेयरहरु आफैंँ आफैं विवादमा जाँदा सत्ताको नेतृत्वमा पुग्ने आकांक्षीहरुबाट आरोप लाग्ने कुरा स्वभाविक नै हो ।

हुनत नेकपा एमालेका नेता महेश बस्नेत पनि बारम्बार विवादमा आईहेने नेतृत्वमा पर्दछन् । उनले व्यक्त गर्ने अभिव्यक्तिप्रति आम नागरिकहरुले विश्वास गर्दैनन् तर, एमालेको नेतृत्वमा उनी विश्वासिलो पात्रभित्र पर्दछन् तै पनि उनी अन्य नेतृत्वउपर आक्रमक हुँदै आउनेहरुको अग्र स्थानमा पर्दछन् ।

पछिल्लो पटक उनी काठमाण्डौका मेयर बालेन्द्र शाह, धरानका मेय हर्क साङपाङ, रविन्द्र मिश्र तथा रमेश खरेल लगायतका नयाँ राजनीतिक नेतृत्वलाई हात खुट्टाले तह लगाउनुपर्ने अभिव्यक्ति दिनु कति उचित वा अनुचित भन्ने विषयमा प्रश्न उठिरहेको छ । यसरी राजनीतिक नेतृत्वको भूमीकामा रहेकाहरुले यसरी अभिव्यक्ति दिनु राम्रो कुरा होइन ।

स्वतन्त्र रुपमा निर्वाचित मेयरहरु पनि त्यति राजनीति बुझेका वा राजनीतिक परिवर्तनमा ठूला योगदान दिएकाबाट छानिएर आएका त होइनन् उनीहरु नागरिकको मतबाट निर्वाचित भएर आएका कारण उनीहरुको अभिमतको सम्मान गर्नु पनि आम नेतृत्वको दायत्व भित्र पर्ने कुरा हो ।

केही समयअघि नेकपा माओवादी केन्द्रका अध्यक्ष पुष्पकमल दाहाल प्रचण्डले हर्क साङपाङको उपस्थिति रहेको एक कार्यक्रममा स्वतन्त्र रुपमा निर्वाचित भएका मेयरहरु फुलबारीमा फुलेका फुलहरु भएको भन्दै चित्रण गरेका थिए, यस खालको अभिव्यक्तिले नागरिकको मतको सम्मान गरेको अनुभूती गराएको थियो भने केही समय अघिदेखी बालेन शाह, हर्क साङपाङ लगायतको एक अर्कालाई नङ्ग्याउने खालको क्रियाकलाप जुन रुपले देखियो यसबाट आम नागरिले पक्ष विपक्षमा अभिमत दिन थाले यो दुःखद् पक्ष हो ।

आगामी संघ र प्रदेशको निर्वाचन नजिकिरहेको बेला स्वतन्त्रदेखि अर्को स्वतन्त्र उम्म्द्वारहरुले एक अर्का र एउटा दलले स्वतन्त्र वा दल–दल विचमा आरोप प्रत्योरोप लगाउने कुरा राम्रो कुरा होइन ।

आफ्नो राजनीतिक एजेण्डा स्थापित गराउन जनताकोमा जाने र जनताको मन छुने खालको नारा तय गर्दै आगामी निर्वाचन मार्फत जितको लक्ष्य हासिल गर्नेगरी जानु नै सबैभन्दा उत्तम कुरा हो यसर्थ अरुको विरोध गर्नुको साटो आफ्नो ऐजेण्डालाई जनस्तरमा लगे आगामी दिनमा राजनीतिमा आउनेहरुलाई समेत राजनीतिक संस्कार सिक्ने÷सिकाउने वातावरण बन्नेछ। यसर्थ विरोध/आरोप/प्रत्योरोपतिर नलागौं ।