तीज भड्किलो नबनोस् ।(सम्पादकीय)

धादिङ,१४ भाद्र ।
हिन्दु नारिहरुको महान पर्व हरितालिका तिज केहि दिनदेखी निरन्तर रुपमा मनाइ रहिएको छ । हरितालिका तीज पर्व आज विशेष रुपमा मनाइने भएपनि विगत केही दिनदेखी नै यसको विभिन्न तौर तरिका र शैैलीले मनाइरहिएकोले कतिपयले यसको आलोचना गरिरहेका छन् त कतिपयले तीज गतिविधिमै संलग्न भई शुभकामना दिने तथा खुसीयाली बाँड्ने काम गरिरहेका छन् ।

हरितालिका तीज विशेष गरी आजका लागि लिईने भएकोले यो वर्ष हिन्दु नारिहरुको लागि महत्वपूर्ण र अर्थपूर्ण पनि छ । अहिलेको स्थानीय तहहरुले समेत तीज पर्व मनाउनैका लागि बजेट नै विनियोजन गरेर सहयोग गरेको छ यो सरकारको तर्फबाट गरिएको सकारात्मक पक्ष हो । जव नारिहरु स्वयम्बाट मनाउन असजिलो भैरहेको छ, सरकारले पनि हातेमालो गरिरहेको यो अवस्थालाई सरोकारवालाहरुले मुक्त कण्ठाले प्रशंसा गर्नु पर्दछ । हिन्दु नारिहरुको लागि यो खुसीको कुरा पनि हो ।

हुनतः पछिल्लो समय हरितालिका तीज भड्किलो हुने गरेको पनि उस्तै किसिमको आलोचना भैरहेको छ । सबै नारिहरुले तीज पर्वको महत्व बुझ्न यो सरोकारवालाहरुले बुझाउन नसकेकोमा विषय गम्भीर विषय पनि हो तर, केही शहर वा बजार केन्द्रित महिलाहरुका कारण तीज भडिकलो बनाइएको आरोप छ जुन केही हदसम्म सत्य पनि छ । गाउँदेखी शहरसम्म छरिएका महिलाहरुले मनाउने तीज उस्तै शैलीको हुनुपर्ने आलोचकहरुको भनाइलाई आम महिलाहरुले भने सम्बोधन गर्न सकेका छैनन् । त्यसतर्फ आम हिन्दु नागरिहरुको ध्यानाकषर्ण हुन जरुरी छ । यो अहिलेको वर्तमान आवश्यकताको विषय पनि हो ।

पछिल्लो समय तीज पर्वको अवसरमा पुरुषलाई गाली गलौज गर्ने, राष्ट्रिय स्तरका कलाकार नै झिकाएर रमझमका साथ कार्यक्रम गर्ने र ठूलो खर्च उठाउने, नयाँनयाँ साडि खरिद गरी देखासिकि गर्ने तथा हप्तौंसम्म दर खाने कार्यक्रमहरु संचालन गर्ने जस्ता कार्यक्रमले तीज कार्यक्रम माथि प्रश्न उठएको छ, यि र यस्ता गतिविधिहरु हामीले सुधार गर्न सकिने विषयहरु हुन् यसतर्फ पनि सरोकारवालाहरुको ध्यान जान सकिरहेको छैन ।

हामीले एउटा पर्वको लागि देखासिकी गर्दा गाउँसम्मका नारीहरुले हाम्रा देखासिकी गर्छन् र तीनदिनको तीज पर्वको लागि आम नारिहरुले गरेको खर्चको हिसाव गर्ने हो भने यसको भोलुम कस्तो होला ? हामीले अहिले गरिरहेकै खर्चको तुलनामा चावपर्वहरु मनाउने हो भने आम मानिसहरुले चाडपर्व खर्च धान्न सम्भव छ त ?

पक्कैै पनि यो खर्चको भोलुम घटाउनु पर्ने हुन्छ त्यसको लागि अहिले तीजपर्व भएकाले यतैबाट खर्च घटाउने र तीज कार्यक्रम शसक्त, प्रभावकारी, सन्देश मुलक र तीजको महत्व झल्किने खालकै बनाउनुपर्छ भन्ने हेतुले लागौं यसमा हामी सबैको भलो हन्छ । आलोचनाका वाणीहरु विस्तारै कम हुदै जान्छन्, सहभागिताका हिसावले महिला पुरुष बराबरी पनि हो भन्ने भावनाको विकास गराउँन पुरुषलाई पनि संगसंगै लगौं यसले दिर्घकालिन फाइदा पुग्न सक्छ । यसकारण पनि तीज भड्किलो नभै महत्वपूर्ण तरिकाले मानौं ।