नेपाली काङ्ग्रेसको १५औँ महाधिवेशन: बागमती प्रदेश प्रतिनिधिमा युवा नेता ठाकुर गुरुङको उम्मेदवारी

धादिङबेशी,१३ असोज । नेपाली काङ्ग्रेसको १५औँ महाधिवेशनअन्तर्गत बागमती प्रदेश प्रतिनिधिको रूपमा युवा तथा लोकप्रिय नेता ठाकुर गुरुङले उम्मेदवारी घोषण गर्नुभएको छ। उहाँले आदिवासी जनजाति कोटाबाट आफ्नो उम्मेदवारी दर्ता गराउनुभएको हो।

धादिङको नेत्रावती डबजोङ गाउँपालिका वडा नम्बर १ का वडा अध्यक्ष तथा गाउँपालिकाका प्रवक्तासमेत रहनुभएका गुरुङ स्थानीय तहमा जनप्रिय जनप्रतिनिधिको रूपमा परिचित हुनुहुन्छ।

जनप्रतिनिधिको भूमिकामा आउनुअघि उहाँले लामो समय पत्रकारिता क्षेत्रमा रहेर समाज र राजनीतिको सूक्ष्म विश्लेषण गर्दै आफ्नो बलियो पहिचान बनाउनुभएको थियो। पत्रकारिताको लामो अनुभव, स्थानीय तहमा जनप्रतिनिधिका रूपमा हासिल गरेको कार्यकुशलता र युवा माझको प्रगाढ सम्बन्धका कारण उहाँको उम्मेदवारीलाई महाधिवेशन प्रतिनिधिहरूले निकै चासो र महत्त्वका साथ हेरेका छन्। “राष्ट्राका लागि, लोकतन्त्रका लागि, काङ्ग्रेसका लागि” भन्ने नाराका साथ चुनावी मैदानमा उत्रिनुभएका गुरुङले आफ्ना मुख्य प्रतिबद्धताहरू समेत सार्वजनिक गर्नुभएको छ।

काङ्ग्रेसलाई जगैदेखि बलियो बनाउन संगठन सुदृढीकरणमा विशेष जोड दिने,पार्टीका हरेक तहमा युवाहरूको सार्थक सहभागिता र नेतृत्व विकास गर्ने,पार्टी राजनीति र सार्वजनिक जीवनमा पारदर्शिता एवं जवाफदेहिता कायम राख्ने,सबै वर्ग, समुदाय र क्षेत्रलाई समेट्दै समावेशी र एकताबद्ध काङ्ग्रेस निर्माण गर्ने,आम नागरिकका दैनिक समस्या र आवश्यकतालाई राजनीति र नीतिको केन्द्रमा राख्ने। आफ्नो अनुभव, स्पष्ट दृष्टिकोण र युवा जोसका कारण आफूलाई बागमती प्रदेश प्रतिनिधिको रूपमा सबै महाधिवेशन प्रतिनिधिहरूले विश्वास गर्नेमा उहाँ विश्वस्त हुनुहुन्छ। “तपाईंको साथ, मेरो प्रतिबद्धता; काङ्ग्रेसको बलियो भविष्य हाम्रो साझा संकल्प” भन्दै उहाँले सम्पूर्ण प्रतिनिधिहरूसँग सहयोग, साथ र मतको अपिल गर्नुभएको छ।