आज हुने भनिएको धादिङ कांग्रेसको गाउँ तथा नगर अधिवेशन असोज ८ गते हुने

धादिङ,७ असोज

नेपाली कांग्रेसको १५औँ महाधिवेशनअन्तर्गत धादिङ जिल्लामा असोज ७ गतेका लागि तय गरिएको गाउँ तथा नगर अधिवेशन एक दिन पछि सारिएको छ। प्राविधिक कारणले निर्धारित मितिमा अधिवेशन सम्पन्न गर्न सम्भव नदेखिएपछि अधिवेशन २०८३ असोज ८ गते गर्ने निर्णय गरिएको हो।नेपाली कांग्रेस जिल्ला निर्वाचन समितिको कार्यालय, धादिङले सूचना जारी गर्दै यसअघि असोज ७ गतेका लागि तय गरिएको गाउँ तथा नगर अधिवेशन प्राविधिक कारणले सो दिन गर्न नसकिने भएकाले नयाँ मिति निर्धारण गरिएको जनाएको छ।

नयाँ मितिअनुसार धादिङका गाउँपालिका तथा नगरपालिकामा हुने अधिवेशनमा क्षेत्रीय प्रतिनिधि, गाउँ तथा नगर सभापति, वडा सभापति, वडा कार्यसमितिका पदाधिकारी तथा सदस्यलगायत पार्टीका प्रतिनिधिहरू सहभागी हुनेछन्।जिल्ला निर्वाचन समितिले अधिवेशनमा सहभागी हुने सम्पूर्ण प्रतिनिधि तथा पार्टीका नेता–कार्यकर्तालाई निर्धारित नयाँ मितिअनुसार आवश्यक तयारीसहित सक्रिय सहभागिता जनाउन अनुरोध गरेको छ।यसअघि नेपाली कांग्रेस धादिङले १५औँ महाधिवेशनअन्तर्गत जिल्लाका १०४ वटै वडामा असोज ५ गते वडा अधिवेशन तथा गाउँ तथा नगर अधिवेशन असोज ७ गते गर्ने कार्यतालिका सार्वजनिक गरेको थियो।

अब गाउँ तथा नगर अधिवेशन असोज ८ गते हुने भएपछि त्यसपछिका अधिवेशनको समयतालिकामा समेत प्रभाव पर्न सक्ने देखिएको छ। अधिवेशनलाई व्यवस्थित, सौहार्दपूर्ण र उत्साहजनक रूपमा सम्पन्न गर्न सबै पक्षको सहयोग र सक्रिय सहभागिता आवश्यक रहेको कांग्रेस धादिङले जनाएको छ।