अन्तर्राष्ट्रिय धादिङ समाजको चौथो महाधिवेशन : निर्वाचन प्रमुख आयुक्तमा अधिवक्ता विश्वराज अधिकारी

अन्तर्राष्ट्रिय धादिङ समाजको चौथो महाधिवेशनका लागि अधिवक्ता विश्वराज अधिकारीलाई निर्वाचन प्रमुख आयुक्तमा नियुक्त गरिएको छ। आगामी असोज ३१ गते धादिङबेँसीमा हुने समाजको चौथो महाधिवेशनलाई व्यवस्थित तथा निष्पक्ष रूपमा सम्पन्न गर्न अधिकारीलाई निर्वाचन प्रमुख आयुक्तमा नियुक्त गरिएको अन्तर्राष्ट्रिय धादिङ समाजका अध्यक्ष राजन खकुरालले जानकारी दिनुभयो।

धादिङ जिल्लाबाट विभिन्न देशमा पुगेका धादिङेलीलाई एकताबद्ध गर्दै जिल्लामा सामाजिक तथा मानवीय सेवाका कार्य गर्ने उद्देश्यले अन्तर्राष्ट्रिय धादिङ समाज स्थापना गरिएको हो। समाजले स्थापना भएदेखि नै जिल्लामा विभिन्न सामाजिक कार्य गर्दै आएको छ। हालसम्म विश्वका २० वटा देशमा रहेका धादिङेली समाजसँग जोडिएको समाजका महासचिव बाबुकाजी भण्डारीले जानकारी दिनुभयो। असोज ३१ गते धादिङबेँसीमा आयोजना हुने चौथो महाधिवेशनको तयारी तीव्र पारिएको समाजले जनाएको छ। महाधिवेशनबाट नयाँ नेतृत्व चयनसँगै समाजको आगामी कार्यदिशा तय गरिने जनाइएको छ।