बाढीपीडितका लागि शिवज्योति महिला साकोसको ७८ हजार सहयोग

धादिङ, भदौ १५:

भोटेकोशी तथा त्रिशूली नदीमा आएको विनाशकारी बाढीबाट प्रभावित नागरिकको राहत तथा पुनः स्थापनाका लागि शिवज्योति महिला बचत तथा ऋण सहकारी संस्था लिमिटेडले ७८ हजार १ सय ५ रुपैयाँ सहयोग गर्ने भएको छ।

संस्थाको सञ्चालक समिति बैठकले सामुदायिक विकास कोष, सञ्चालक समिति तथा उपसमिति र कर्मचारीको तर्फबाट उक्त रकम सहयोग गर्ने निर्णय गरेको हो।

संस्थाका अनुसार सामुदायिक विकास कोष, सञ्चालक समिति तथा उपसमिति र कर्मचारीका तर्फबाट प्राप्त हुने रकम गरी बाढीपीडितका लागि कुल ७८ हजार १ सय ५ रुपैयाँ सहयोग गरिने संस्थाले जनाएको छ।

भोटेकोशी तथा त्रिशूली नदीमा आएको बाढीका कारण धादिङसहित विभिन्न जिल्लामा जनधनको क्षति हुनुका साथै ठूलो संख्यामा नागरिक प्रभावित भएपछि राहत तथा पुनःस्थापनाका लागि सहयोग जुटाउने क्रम चलिरहेको छ।

यसै क्रममा शिवज्योति महिला साकोसले आफ्नो सामाजिक उत्तरदायित्वअन्तर्गत बाढी प्रभावित नागरिकलाई राहतमा सहयोग पुर्‍याउने निर्णय गरेको हो।

सामुदायिक विकास कोषबाट संस्थागत रूपमा रकम उपलब्ध गराउनुका साथै सञ्चालक समिति, उपसमिति र कर्मचारीबाट समेत सहयोग गर्ने निर्णयले विपद्को समयमा संस्थासँग आबद्ध पक्षको सामाजिक उत्तरदायित्व र सहभागितालाई देखाएको छ।