त्रिशूलीको बाढीले चरौंदी स्थित घ्याल्चोक जोड्ने झोलुङ्गे पुल बगायो

धादिङ, १४ भदौ : त्रिशूलीमा आज आएको बाढीले धादिङको चरौँदी र गोरखाको गण्डकी गाउँपालिका–८ घ्याल्चोक जोड्ने झोलुङ्गे पुल बगाएको छ । बाढीले लगातार तीन घण्टा हानेपछि बिहान ११ः३० बजेतिर पुल ढलाएर बगाएको थियो ।

पुल लगेपछि गण्डकी गाउँपालिका ७ र ८ का बासिन्दा त्रिशूली तरेर राजमार्गतर्फ जान समस्या भएको छ । “घ्याल्चोकका करिब ४०० घरधुरी किसानले तरकारी र दूध बोकेर चरौँदीको कृषि सहकारीमा लैजाने गरेका थिए । अब त्यहाँका किसानले तरकारी र दूध बेच्न समस्या भएको छ ।

यसअघि गत भदौ १० गते बुधबार आएको बाढीले यसभन्दा केही तल रहेको धवादीघाटको पुल लगेको थियो । सो पुल लगेपछि स्थानीयवासी घ्याल्चोकको पुल भएर वारपार गर्ने गरेका थिए । यो पुल लगेपछि स्थानीयवासीलाई समस्या भएको छ ।

घ्याल्चोक–चरौँदी जोड्ने १३० मिटर लामो पुल छ वर्षअघि मात्र निर्माण भएको स्थानीयको भनाइ छ ।