धादिङका युवाको १५ बुँदे घोषणापत्र सार्वजनिक, युवालाई विकासका साझेदार र नेतृत्वकर्ताका रूपमा स्वीकार गर्न माग

धादिङबेशी,२७ साउन । धादिङका युवाहरूले युवालाई विकासका लक्षित समूहका रूपमा मात्र नभई विकासका साझेदार र नेतृत्वकर्ताका रूपमा स्वीकार गर्न सरकारसँग माग गरेका छन् । अन्तर्राष्ट्रिय युवा दिवस–२०२६ को अवसरमा आयोजित ‘धादिङ युथ क्याफे–२०२६’ कार्यक्रममा युवाका साझा सवाल समेटिएको १५ बुँदे ‘धादिङ युवा घोषणापत्र–२०८३’ सार्वजनिक गरिएको हो ।
‘खुलेर कुरा गरौँ, मिलेर परिवर्तन गरौँ’ भन्ने नारासहित आयोजित कार्यक्रममा विभिन्न युवा सञ्जाल, समूह, उद्यमी तथा सामाजिक क्षेत्रमा क्रियाशील युवाहरूको सहभागिता रहेको थियो।

घोषणापत्रमा बेरोजगारी, सीप तथा रोजगारीको अभाव, उद्यमशीलताका लागि वित्तीय पहुँचको कमी, मानसिक स्वास्थ्यसम्बन्धी चुनौती र निर्णय प्रक्रियामा युवाको न्यून सहभागितालाई प्रमुख समस्याका रूपमा उल्लेख गरिएको छ।

युवाहरूले स्थानीयस्तरमै रोजगारी सिर्जना गर्न, युवा उद्यम तथा स्टार्टअपका लागि सहुलियतपूर्ण वित्तीय पहुँच विस्तार गर्न र बजारको मागअनुसार सीपमूलक शिक्षा तथा तालिमको व्यवस्था गर्न माग गरेका छन्।

त्यस्तै सुरक्षित वैदेशिक रोजगारी सुनिश्चित गर्न तथा विदेशबाट फर्किएका युवाको सीप, अनुभव र पुँजीलाई स्थानीय उत्पादन तथा उद्यममा उपयोग गर्ने नीति बनाउनुपर्ने घोषणापत्रमा उल्लेख छ ।
युवा महिलासहित पछाडि पारिएका समुदायका युवाका लागि समान अवसर सुनिश्चित गर्न, स्थानीय योजना तथा बजेट निर्माण प्रक्रियामा युवाको अर्थपूर्ण सहभागिता बढाउन तथा युथ इन्फर्मेसन सेन्टर स्थापना गर्न पनि माग गरिएको छ।

घोषणापत्रमा डिजिटल साक्षरता, कृत्रिम बुद्धिमत्ता—एआई र डिजिटल उद्यमशीलतासम्बन्धी अवसर विस्तार गर्नुपर्ने विषयसमेत समेटिएको छ। युवाहरूले सामाजिक सद्भाव, समावेशिता, वातावरण संरक्षण र सामाजिक परिवर्तनमा सक्रिय भूमिका निर्वाह गर्ने आठबुँदे प्रतिबद्धतासमेत व्यक्त गरेका छन्।

बढ्दो वैदेशिक रोजगारी र युवा पलायनलाई ध्यानमा राख्दै युवालाई विदेश जान रोक्नेभन्दा स्वदेशमै रोजगारी, उद्यम र विकासका अवसर सिर्जना गर्नुपर्ने उनीहरूको निष्कर्ष छ।
‘युवा पलायन रोकौँ, युवाका लागि अवसर सिर्जना गरौँ, धादिङ निर्माण गरौँ’ भन्ने मूल प्रतिबद्धतासहित घोषणापत्र सार्वजनिक गरिएको हो।