सिद्धलेक गाउँपालिकाको १८ औँ हिउँदे अधिवेशन सम्पन्न

धादिङबेशी १४ चैत्र । सिद्धलेक गाउँपालिकाको १८औँ हिउँदे अधिवेशन शुक्रबार गाउँपालिकाको सभाहल, बुङचुङमा सम्पन्न भएको छ । अधिवेशनमा चालु आर्थिक वर्ष २०८२/८३ को प्रगति समीक्षा, बजेट कार्यान्वयन अवस्था तथा योजना संशोधनका विषयमा छलफल गरिएको थियो ।

अधिवेशनमा गाउँपालिकाका अध्यक्ष परशुराम खतिवडाले प्रस्तुत गर्नुभएको प्रगति विवरण अनुसार हालसम्म गाउँपालिकाले आन्तरिक राजस्व र विभाज्य कोषमार्फत १ करोड ४० लाख ८ सय ९९ रुपैयाँ आम्दानी गरेको छ । समग्र वित्तीय प्रगति ३६.६२ प्रतिशत रहेको उहाँले जानकारी दिनुभयो। खर्चतर्फ ‘सृजित दायित्व’ मा शतप्रतिशत प्रगति हासिल भएको छ भने ‘भुक्तानी दिन बाँकी योजनाहरू’ मा ७१.५२ प्रतिशत खर्च भएको छ ।

क्षेत्रगत उपलब्धिहरू उल्लेख गर्दै अध्यक्ष खतिवडाले न्यायिक समितिमा दर्ता भएका ७ उजुरीमध्ये ५ वटा फछ्र्यौट भइसकेको जानकारी दिनुभयो। साथै ७० जनालाई कानुनी सचेतना र १५ जनालाई न्यायिक सहजीकरण सेवा प्रदान गरिएको छ ।

शिक्षा क्षेत्रमा १०३ शिक्षक, १४ विद्यालय र १७ विद्यार्थीलाई सम्मान गरिएको छ भने स्थानीय पाठ्यक्रम निर्माण कार्य सुरु गरिएको छ । स्वास्थ्य सेवातर्फ १९ हजार ६८५ नागरिकले सेवा लिएका छन्। ६५० जनाले स्वास्थ्य शिविरबाट लाभ लिएका छन् भने १५० किशोरीलाई HPV खोप प्रदान गरिएको छ । त्यस्तै ५४ जना कडा रोगीलाई मासिक ५ हजार रुपैयाँका दरले उपचार सहुलियत उपलब्ध गराइएको छ ।

कृषि तथा पशु सेवामा ११ हजार ९ पशुको उपचार, ९४ वटा कृत्रिम गर्भाधान र ८२ प्रयोगशाला परीक्षण सम्पन्न भएका छन्। जैविक खेती प्रवद्र्धनका कार्यक्रमलाई समेत प्राथमिकतामा राखिएको छ । पूर्वाधार विकासतर्फ ठेक्कामार्फत सञ्चालनमा रहेका १० योजनाको भौतिक प्रगति ४३ प्रतिशत पुगेको छ भने उपभोक्ता समितिमार्फत सञ्चालन हुने ३०० योजनामध्ये २२५ वटाको सम्झौता भइसकेको छ, जसको वित्तीय प्रगति ६५ प्रतिशत रहेको छ ।

सामाजिक तथा रोजगार कार्यक्रमअन्तर्गत वडा नं. २ मा २०० दलित तथा विपन्न घरधुरीको सर्वेक्षण सम्पन्न गरिएको छ । SAMI कार्यक्रममार्फत २१ जनालाई मनोसामाजिक परामर्श सेवा दिइएको छ । वैदेशिक रोजगारीतर्फ ७ जनालाई पुनः श्रम स्वीकृति प्रदान गरिएको छ भने विदेशमा मृत्यु भएका एक जनाको परिवारलाई आर्थिक सहायताका लागि सहजीकरण गरिएको छ ।

यसैगरी उपप्रमुख सबिता अर्यालले प्रस्तुत गर्नुभएको बजेट प्रतिवेदन अनुसार गाउँपालिकाको कुल बजेट ६७ करोड ४९ लाख ८४ हजार ९ सय १४ रुपैयाँ रहेको छ । चालूतर्फ ४० करोड ८९ लाख ४१ हजार ४ सय ७९ रुपैयाँमध्ये ४३.८ प्रतिशत र पूँजीगततर्फ २६ करोड ६० लाख ४३ हजार ४ सय ३४ रुपैयाँमध्ये २५.६१ प्रतिशत खर्च भएको छ ।

अधिवेशनले बजेट कार्यान्वयनलाई लचिलो बनाउन महत्वपूर्ण व्यवस्था पनि समेत गरेको छ । विधेयकमार्फत गाउँ कार्यपालिकालाई कुल बजेटको १० प्रतिशतसम्म रकमान्तर गर्ने अधिकार दिइएको छ भने सोभन्दा बढी रकम सार्न गाउँसभाको स्वीकृति अनिवार्य गरिएको छ ।

योजना तथा कार्यक्रमतर्फ केही नाम संशोधन र पुनर्संरचना गरिएको छ । ‘जाले पदमार्ग’ लाई ‘खर्क पदमार्ग’ नामकरण गरिएको छ भने ‘पुण्यश्वरी आ.वि. भवन’ लाई ‘कुण्यश्वरी आ.वि. भवन’ बनाइएको छ। ‘खाली मौरीको घर सहयोग’ शीर्षकको बजेट ‘कृषि एम्बुलेन्स सञ्चालन व्यवस्थापन’ मा सारिएको छ ।

त्यसैगरी ४ लाख ६० हजार रुपैयाँ बराबरका केही कार्यक्रम पुनर्संरचना गरिएको छ । स्वास्थ्य स्वयंसेविकासम्बन्धी केही खर्च शीर्षक हटाइएका छन् भने खोप तथा औषधी ढुवानी, नियमित बैठक तथा समीक्षा र ‘ज्वानो जाउलो’ कार्यक्रम थपिएका छन् ।

अधिवेशनले समग्रमा बजेटलाई यथार्थपरक बनाउँदै कार्यान्वयनमा तीव्रता ल्याउने, आवश्यकताअनुसार स्रोत पुनःवितरण गर्ने तथा योजनाहरूलाई समयानुकूल परिमार्जन गर्ने लक्ष्यसहित निर्णयहरू गरेको गाउँपालिकाले जनाएको छ ।