नीलकण्ठ बहुप्राविधिक शिक्षालयमा ३९० घण्टे सिपमूलक तालिम सम्पन्न, डिप्लोमा तहका प्रशिक्षार्थीलाई विदाई

धादिङ, चैत्र ०१ गते ।
नीलकण्ठ बहुप्राविधिक शिक्षालय, नीलकण्ठ नगरपालिका–४ मा सञ्चालित निःशुल्क ३९० घण्टे सिपमूलक तालिमको समापन तथा डिप्लोमा तहका प्रशिक्षार्थीहरूको विदाई कार्यक्रम सम्पन्न भएको छ।

कार्यक्रमका अवसरमा मोटरसाइकल सर्भिस मेकानिक, वेटर/वेट्रेस, मन्टेश्वरी, र सिलाइ–कटाइ अन्तर्गत तालिम पूरा गरेका ८० जना सहभागीलाई प्रमाणपत्र वितरण गरिएको थियो।

यी तालिमबाट कुल ८० जना सहभागीले सीप हासिल गरेका छन्, जसमा केही प्रशिक्षार्थीहरू रोजगारीमा समेत आवद्ध भइसकेका शिक्षालयका प्रिन्सिपल नरेश बरालले जानकारी दिनुभयो ।

त्यसैगरी डिप्लोमा तहअन्तर्गत हाइड्रोपावरमा २५ जना र अटोमोबाइल इन्जिनियरिङमा ९ जना प्रशिक्षार्थीलाई विदाई गरिएको छ। तालिममा धादिङसहित विभिन्न जिल्लाका प्रशिक्षार्थीहरूको सहभागिता रहेको थियो ।

कर्यक्रमलाई सम्बोधन गर्नुहुँदै नीलकण्ठ नगरपालिकाका नगर प्रमुख भीम प्रसाद ढुंगानाले युवालाई रोजगारी र आत्मनिर्भर बनाउन प्राविधिक शिक्षालाई प्राथमिकतामा राखिएको बताउनुभयो । उहाँले सीपबिना विदेश जाने धेरै युवाले अपेक्षित काम र पारिश्रमिक नपाउने तथा कतिपय अवस्थामा स्वदेश फर्किनुपर्ने अवस्था आउने भएकाले तालिमसहितको प्राविधिक शिक्षा आवश्यक रहेको बताउनुभयो । प्राविधिक शिक्षा प्राप्त गरेपछि युवाले विदेशमा मात्र होइन स्वदेशमै पनि राम्रो आम्दानी गर्न सक्ने उहाँको भनाइ छ।

नगर प्रमुख ढंगानाले नगरपालिकाले युवालाई सीपमूलक तालिम र स्वरोजगारका लागि सहुलियत ऋण सुविधा समेत उपलब्ध गराउँदै आएको जानकारी दिनुभयो । उहाँले सीप भएका व्यक्तिलाई रोजगारीका अवसर स्वतः आउने उल्लेख गर्दै युवालाई प्राविधिक शिक्षा तथा तालिमतर्फ आकर्षित हुन आग्रह गर्नुभयो ।

त्यसैगरी नीलकण्ठ–८ का वडा अध्यक्ष प्रकाश कुमार श्रेष्ठले तालिम पूरा गरेका सहभागीलाई प्रमाणपत्र प्राप्त हुनु अन्तिम लक्ष्य नभई वास्तविक जीवनमा सीप प्रयोग गर्ने चरण अब सुरु भएको बताउनुभएको छ। उहाँले विभिन्न क्षेत्रमा तालिम लिएका सहभागीलाई प्राप्त सीपको सदुपयोग गर्दै रोजगारी र स्वरोजगारतर्फ अघि बढ्न आग्रह गर्नुभयो । उहाँले अहिले पनि बजारमा दक्ष जनशक्तिको अभाव रहेको उल्लेख गर्दै सीप भएका व्यक्तिलाई रोजगारीका अवसर स्वतः आउने धारणा व्यक्त गर्नुभयो ।

शिक्षा समन्वय इकाइ प्रमुख भुमिलाल सुवेदीले प्राविधिक तथा व्यावहारिक शिक्षालाई “जीवन धान्ने शिक्षा” भएको बताउनुभएको छ। उहाँले मोटरगाडी तथा मोबाइल मर्मत, सिलाइ–बुनाइ, मन्टेसरी तथा इन्जिनियरिङ जस्ता सीपमूलक तालिमहरूले युवालाई रोजगारी र स्वरोजगारतर्फ अघि बढ्न महत्वपूर्ण भूमिका खेल्ने उल्लेख गर्नुभयो । उहाँले यस्ता सीपमूलक शिक्षालाई पनि उच्च तहसम्म मान्यता दिइने भएकाले सिकाइलाई निरन्तरता दिन आग्रह गर्नुभयो ।

नीलकण्ठ बहुप्राविधिक शिक्षालयका प्रन्सिपल नरेस बरालको अध्यक्षतामा भएको कार्यक्रममा, नीलकण्ठ नगरपालिकाका नगर प्रमुख भीम प्रसाद ढुंगाना, शिक्षा समन्वय इकाइका प्रमुख भुमिलाल सुवेदी, नीलकण्ठ वडा नं ८ का अध्यक्ष प्रकास कुमार श्रेष्ठ, सशस्त्र प्रहरी बल नेपाल, धादिङका गुल्मपती डिएसपी माला आवा, वडा नं ४ का अध्यक्ष हरि बहादुर श्रेष्ठ लगायत तालिममा सहभागि र प्रशिक्षर्थीहरुको उपस्थिति रहेको थियो ।

हाल शिक्षालयमा प्रमाणपत्र तह (डिप्लोमा) अन्तर्गत सिभिल इन्जिनियरिङ र अटोमोबाइल इन्जिनियरिङ विषयमा अध्ययन सञ्चालन हुँदै आएको छ। शिक्षालयले स्थानीय समुदायको आवश्यकता अनुसार छोटो अवधिका सीपमूलक तालिमहरू पनि सञ्चालन गर्दै आएको छ।
शिक्षालयले आगामी दिनमा २० जनाका लागि इलेक्ट्रिसियनसम्बन्धी नयाँ तालिम सञ्चालन गर्ने तयारी गरेको शिक्षालयका प्रिन्सिपल बरालले बताउनुभयो ।

प्राविधिक शिक्षाको आवश्यकता महसुस गर्दै नीलकण्ठ नगरपालिकाको पहलमा स्थापना गरिएको शिक्षालयले समुदायमा सीपमूलक शिक्षा विस्तारमा महत्वपूर्ण भूमिका खेल्दै आएको उहाँको भनाइ छ। बरालले संस्थाको स्थापना तथा सञ्चालनमा सहयोग गर्ने नगरपालिका, वडा कार्यालय तथा अन्य सरोकारवालाप्रति कृतज्ञता व्यक्त गर्दै आगामी दिनमा भौतिक पूर्वाधार विस्तार गरी थप कार्यक्रम सञ्चालन गर्ने लक्ष्य रहेको बताउनुभयो ।