धादिङबेसीमा ‘सकारात्मक सोच, उज्ज्वल भविष्य’ कार्यक्रम सम्पन्न

धादिङबेशी । मानिसभित्रको नकारात्मकता हटाउँदै सकारात्मक सोच र जीवनप्रतिको दृष्टिकोण परिवर्तन गर्ने उद्देश्यसहित धादिङबेसीमा ‘सकारात्मक सोच, उज्ज्वल भविष्य’ विषयक कार्यक्रम सम्पन्न भएको छ ।

ब्रम्हकुमारी राजयोग सेवाकेन्द्र धादिङबेसीको आयोजनामा बिहीबार बिहान सम्पन्न कार्यक्रममा सहभागीहरूलाई प्रयोगात्मक प्रशिक्षणसमेत प्रदान गरिएको थियो । कार्यक्रममा प्रशिक्षक ब्रम्हकुमार विजयराज सिग्देलले नकारात्मक सोच, डर र असन्तोषले मानिसको जीवनलाई बोझिलो बनाउने उल्लेख गर्दै सकारात्मक विचार, आत्मचिन्तन र चेतनाको विकासले जीवन सहज र सुखी बन्ने बताए ।

कार्यक्रममा मानिसको मस्तिष्क, मुटु र मन स्वच्छ भएमा मात्रै सन्तुलित र सुखी जीवन सम्भव हुने धारणा प्रस्तुत गरिएको थियो । सहभागीहरूलाई योग र ध्यानको अभ्यास गराउँदै मानसिक शान्ति र आत्मबल वृद्धि गर्ने उपायहरू सिकाइएको थियो ।

ब्रम्हकुमारी नन्दाको अध्यक्षतामा सम्पन्न कार्यक्रमको उद्घाटन प्रमुख जिल्ला अधिकारी विजयराज सुवेदीले गर्नुभएको थियो । उद्घाटन मन्तव्यमा प्रमुख जिल्ला अधिकारी सुवेदीले आजको व्यस्त र तनावपूर्ण जीवनशैलीमा यस्ता कार्यक्रमहरूले मानिसलाई आत्मिक शान्ति र सकारात्मक दिशातर्फ डो¥याउने उल्लेख गरे ।

कार्यक्रममा नागरिक समाजका अगुवा, सुरक्षा निकायका प्रतिनिधि लगायत विभिन्न क्षेत्रका व्यक्तिहरूको सहभागिता रहेको थियो । सहभागीहरूले कार्यक्रमले आफ्नो सोच र जीवनशैलीमा सकारात्मक प्रभाव पारेको प्रतिक्रिया दिएका छन् । कार्यक्रममा प्रशिक्षक रुपमा ब्रम्हकुमार विजयराज सिग्देल रहनुभएको थियो ।