सामुदायिक वन नविकरणलाई प्राथमिकता दिइने छ : डिभिजनल वन अधिकृत पोखरेल

धादिङबेंसी, मंसिर ०४ गते ।
डिभिजन वन कार्यलय धादिङका डिभिजनल वन अधिकृत रोशना पोखरेलले धादिङमा सामुदायिक वनको नविकरणलाई प्राथमिकता दिएर काम अघि बढाइने बताउनुभएको छ । नेपालकै सबैभन्दा धेरै सामुदायिक वन भएको जिल्ला धादिङमा नविकरणका चुनौती बढिरहेका बेला उहाँले पहिले नविकरणको कामलाई अघि बढाइने जानकारी दिनुभयो।

बिहीबार डिभिजनल वन अधिकृत रोशना पोखरेलको संयोजकत्वमा भएको पत्रकार भेटघाट कार्यक्रममा उहाँले सो कुरा बताउनुभएको हो । धादिङमा ७१८ सामुदायिक वन रहेको छ। यी वन क्षेत्रको प्रभावकारी व्यवस्थापन गर्न नविकरण गरेर जिरो बनाउने लक्ष्यसहित काम सुरु भइरहेको अधिकृत पोखरेलले बताउनुभयो।

जिल्लामा पारिजात संरक्षण, गणेश हिमाल संरक्षण, चिउरी–चमेरो संरक्षण, सालक संरक्षण, नक्षेत्र बाटी, र रुबीभ्याली क्षेत्रका जैविक विविधता संरक्षण कार्यक्रमलाई निरन्तरता दिइने छ। धादिङमा २७ प्रजातिका विरुवा भएको दुर्लभ वनस्पतियुक्त बोटसमेत भेटिएको छ, जसको अनुसन्धानका लागि राष्ट्रिय वनस्पति विभागका विशेषज्ञहरू आउने तयारीमा हुनुहुन्छ, पोखरेलले भन्नुभयो ।

जिल्लामा पारिजातको जंगल धेरै भएकोले पारिजात फुलको चिया उत्पादनलाई प्रामोट गर्न मन्त्रालयमा पहल गरिने पनि उहाँले जानकारी दिनुभयो। “जिल्लामा पहिले भएका कार्यक्रमहरूको निरन्तरता र सुधार गर्दै अगाडि बढ्छौँ,” अधिकृत पोखरेलले भन्नुभयो ।

डिभिजनल वन अधिकृत पोखरेल कात्तिक २१ गते धादिङ आउनुभएको हो । उहाँ यसअघि नुवाकोट डिभिजन वन कार्यलयमा कार्यरत हुनुहुन्थ्यो।