एमालेमाथि नियोजित हमला: कार्यकर्तालाई एकजुट हुन वरिष्ठ उपाध्यक्ष पोखरेलको आह्वान

धादिङ — नेपाल कम्युनिष्ट पार्टी (एमाले)का वरिष्ठ उपाध्यक्ष ईश्वर पोखरेलले पार्टीमाथि भइरहेको हमलाको डटेर प्रतिकार गर्न कार्यकर्तालाई आह्वान गर्नुभएको छ। नेकपा एमाले धादिङको नवौं जिल्ला अधिवेशन प्रतिनिधि परिषद्को प्रथम बैठकलाई सम्बोधन गर्दै उहाँले पार्टीको राष्ट्रवादी अडानलाई कमजोर पार्ने नियोजित प्रयास भइरहेको भन्दै एकजुट प्रतिकारको आवश्यकता औंल्याउनुभयो।

पोखरेलले भन्नुभयो, “हाम्रो पार्टी जन्मसिद्ध अधिकार र वंशानुगत सत्ताको विपक्षमा छ। हामी लोकतन्त्रको पक्षमा दृढताका साथ उभिएका छौं, त्यसैले हामिमाथि हमला भइरहेको छ।” उहाँले संविधानको सर्वोच्चता, कानूनी शासन, विकास, समृद्धि र सामाजिक सद्भावप्रतिको पार्टीको अडानले विरोधीहरूलाई असहज बनाएको उल्लेख गर्नुभयो।

कार्यक्रममा एमाले जिल्ला अध्यक्ष भूमीप्रसाद त्रिपाठीले संगठन, सदस्यता र जिल्लामा अन्य दलहरूको उपस्थिति विश्लेषणसहितको राजनीतिक तथा सांगठनिक प्रतिवेदन पेश गर्नुभयो।

प्रतिनिधि परिषद्को बैठकमा एमाले केन्द्रीय सदस्य खेमप्रसाद लोहनी, जानुका सिंखडा, सल्लाहकार परिषद सदस्य जगन्नाथ नेपाल, बागमती प्रदेश सचिव नवराज सिलवाल लगायतले आगामी निर्वाचन रणनीति, जनसम्पर्क अभियान तथा विचारधारात्मक स्पष्टताबारे धारणा व्यक्त गरेका थिए।

एमाले धादिङकी सचिव राधिका सापकोटाले प्रतिनिधि परिषद्ले दिएको मार्गदर्शनअनुसार सांगठनिक सुदृढीकरण र वैचारिक स्पष्टतामा थप ध्यान दिइने जानकारी दिनुभयो। कार्यक्रममा पार्टीका पुराना नेताहरुलाई सम्मान समेत गरिएको थियो।