पुस्तक तथा स्टेशनरी व्यवसायी महासंघ बागमती प्रदेशको तेस्रो अधिवेशन धादिङबेशीमा सुरु

धादिङबेशी । नेपाल पुस्तक तथा स्टेशनरी व्यवसायी महासंघ बागमती प्रदेशको पाचौँ बार्षिक साधारण सभा तथा तेस्रो अधिवेशन धादिङबेशीमा सुरु भएको छ । शुक्रबार नेपाल पुस्तक तथा स्टेशनरी व्यवसायी महासंघ बागमती प्रदेश समितिका अध्यक्ष नारायण कुमार श्रेष्ठको सभापतित्व तथा संघीय साँसद रामनाथ अधिकारीको प्रमुख आतिथ्यतामा कार्यक्रम उद्घाटन गरिएको हो ।

साधारण सभालाई सम्बोधन गर्नुहुँदै प्रमुख अतिथि तथा संघीय सांसद रामनाथ अधिकारीले २/३ वर्ष अघिको सम्झना गर्नुहुँदै समयमा विद्यालयमा विद्यार्थीहरुको हातमा पुस्तक नपर्ने गरेकोमा अहिले देशभरी छरीएका व्यवसायी एक भएर लागेकोले सहज भएको बताउनुभयोे ।
उहाँले सबै मर्यादित भएर पुस्तक व्यवसायलाई अगाडि बढाउनु पर्ने बताउनुभयो । पुस्तक व्यवसायीको विचार र समस्यालाई आफुले राज्यसमक्ष लगेर समाधान गर्न सहयोग गर्ने साँसद अधिकारीले विस्वास दिलाउनु भएको छ ।

कार्यक्रममा बोल्दै नेपाल पुस्तक तथा स्टेशनरी व्यवसायी महासंघका महासचिव शिवसागर शर्माले पुस्तकको मूल्य १२ वर्ष देखि समायोजन नहुँदा व्यवसायीहरु मर्कामा परेको बताउनु भयो ।  पुस्तक तथा स्टेशनरी व्यवसायीहरुको छाता संस्थाको रुपमा रहेको नेपाल पुस्तक तथा स्टेशनरी व्यवसायी महासंघले र्शैक्षिक सत्रको सुरुमै पाठ्यपुस्तक विद्यालयमा पु¥याउने काम गरेर सरकारको कामलाई सहयोग गरिरहेको उहाँले बताउनु भयो ।

व्यवसायी अगुवाहरुले पुस्तकको मूल्य समायोजन गर्नका लागि सरकारसँग माग गरिएको छ । १२ वर्ष अघि ७५ रुपैयाँ प्रतिकेजी परेकोमा अहिले २ सय ५० पर्दा पनि मूल्य समायोजन नभएको व्यवसायीको गुनासो छ ।

साधारणसभाको अवसरमा धादिङमा २०४३ सालमा स्टेसनरी तथा पुस्तक पसल सुरुवात गर्ने गोविन्द श्रेष्ठ, प्रदेशमा रहेर काम गरेका सचिव हरि पौडेललाई सम्मानित गरिएको छ । सोहि अवसरमा प्रदेश भरमा उत्कृष्ट काम गर्ने धादिङ शाखालाई समेत सम्मान गरिएको थियो । शुक्रबारदेखि धादिङबेशी स्थित जिल्ला समन्वय समितिकको हलमा सुरु भएको साधारण सभा तथा अधिवेशन शनिबार समापन हुने छ ।