किसान र कृषि क्षेत्रको बिकासका निमित्त नगरपालिकाले काम गरिरहेको छ :उपमेयर दिपक विश्वकर्मा

धादिङबेशी । नीलकण्ठ नगरपालिकाका उपमेयर दिपक बिश्वकर्माले किसान र कृषि क्षेत्रको बिकासका निमित्त नगरपालिकाले बिभिन्न काम गरिरहेको बताउनु भएको छ ।

साना किसान कृषि सहकारी संस्था लिमिटेड सुनौलाबजारको २१ औँ वार्षिक साधारण सभालाई सम्बोधन गर्दै उप मेयर दिपक बिश्वकर्माले सो कुरा बताउनु भएको हो । शनिबार नीलकण्ठ नगरपालिका–६ स्थित सुनौला बजारको टुडिखेलमा सहकारीको बार्षिक साधारण सभा सम्पन्न भएको छ ।

कार्यक्रममा बोल्नुहुँदै उहाँले किसानको लागि कृषि क्षेत्र आर्थिक उन्नतीको क्षेत्र भएको भन्दै प्रत्येक वडामा उत्पादनलाई केन्द्रित गरेर उत्पादन संकलन केन्द्र बनाउन नीलकण्ठ नगरपालिका लागिरहेको बताउनु भएको छ । मुलुक आर्थिक हिसावले संकटको अवस्था देखिरहेको अवस्थामा बिभिन्न बैङक,बित्तिय संस्थाहरु एक पछि अर्को संकटहरु देखिरहेको बेलामा आफ्नो छरिएर रहेको स–साना पुजीलाई एकिकृत गरि गाउँमा नै सुख दुख परेकोबेला महत्वपूर्ण कारोबार गर्ने संस्थाको रुपमा पहिचान बनाउनु सफल भएकोमा सहकारीलाई धन्यावाद सहित प्रगतीको शुभकामना दिनु भएको छ ।

उहाँले सुनौलाबजार भनेको अदुवा, बेसार, फर्सी, स्कोस खेतीको लागी लोकप्रिय ठाउँ भएकोले यस खेतिको प्रवध्रन र बजारीकरणका निमित्त आगामी दिनमा अनुदान लगाएत कुरामा सहयोग गरिने बताउनु भएको छ । कृषि क्षेत्र नै किसानहरुको आर्थिक उन्नतीको क्षेत्र हुन सक्छ भनेर नीलकण्ठ नगरपालिकाले एक वडा एक उत्पादन संकलन केन्द्र बनाउने, उत्पादनको आधारमा अनुदानहरु प्रदान गर्ने, नगरपालिकाले एक चिस्यान केन्द्र बनाउने भनेर कार्यक्रम बनाई दातृ निकायहरु संग समन्वय भैरहेको उहाँले बताउनु भयो ।

सहकारीहरुले दिएका बिभिन्न आय आर्जन सम्बन्धी तालिमहरु लिएर किसानहरु उत्पादनमा होमिए बजारीकरणको जिम्मा आफुहरुले लिन तयार भएको उहाँको भनाई छ । उहाँले सस्तो ब्याजदरको पैसा लगेर ब्यवसायीक बन्नु पर्ने कुरामा जोड दिनु भएको छ । उहाँले किसानहरुले श्रमलाई सम्मान गरि कार्य गरेमा सफलता पुगिने भन्दै कृषि पेशा बाट नै ब्यक्ति, परिवार र समाजलाई आर्थिक हिसावले समेत टेवा पुग्ने बताउनु भयो । उहाँले किसान र कृषि क्षेत्रको बिकासका निमित्त नीलकण्ठ नगरपालिकाले विभिन्न कार्यक्रमहरु संचालन गर्ने समेत आश्वासन दिनु भएको छ ।

त्यसैगरी बार्षिक साधारण सभालाई सम्बोधन गर्दै कार्यक्रमका बिशेष अतिथि तथा वडा न ६ का वडा अध्यक्ष भुपेन्द्र कुमार श्रेष्ठले जनताको भावना अनुसार नै आफुले प्रतिवद्ध भएर सेवा प्रवाह गरिरहेको बताउनु भएको छ ।

सहकारी संस्थाका अध्यक्ष कृष्ण बहादुर श्रेष्ठको अध्यक्षतामा सम्पन्न साधारण सभामा नीलकण्ठ नगरपालिकाका उपमेयर दिपक विश्वकर्माको प्रमुख आतिथ्यता तथा वडा नं– ६ का वडा अध्यक्ष भुपेन्द्र कुमार श्रेष्ठ र कार्यपालिका सदस्य लक्ष्मण रम्तेलको विशेष अतिथि रहेको थियो ।

साधारण सभाले तयार पारेको बार्षिक साङ्गठनिक तथा आर्थिक प्रतिवेदन सर्वसहमत पास गरेको छ ।