संविधानले दिएको अधिकार भित्र रहेर शिक्षकहरूको माग सम्बोधन गर्नुपर्छः मेयर ढुंगाना

धादिङ,९ असोज 
नेपाल नगरपालिका संघका अध्यक्ष भीम प्रसाद ढुंगानाले संविधानले दिएको अधिकार भित्र रहेर शिक्षकहरूले उठाएको माग सम्बोधन गरिनुपर्ने बताउनुभएको छ । आज सत्तारूढ दल नेपाली कांग्रेस संसदीय दलले संसद भवन बानेश्वरमा गरेको संघिय शिक्षा विधेयकको बारेमा सरोकारवालाहरूसँग गरेको छलफलमा भाग लिंदै अध्यक्ष ढुंगानाले आफुहरूलाई समेत पढाएका गुरूहरू प्रति सम्मान रहेको भन्दै स्थानिय तह मातहत बस्दैनौ भन्ने अधिकार भने बिद्यालय शिक्षकहरूलाई नरहेको बताउनु भयो ।

उहाले संविधानले विद्यालय शिक्षा स्थानिय सरकारको एकल अधिकार भित्र पर्ने विषय रहेको प्रति सबैको ध्यानाकर्षण गराउनुभयो । उहाँले स्थानिय सरकारले संविधानले व्यवस्था गरे बमोजिमका कानुनहरू बनाएर गुणस्तरीय शिक्षामा जोड दिईरहेको पनि बताउनुभयो ।
नेपाली कांग्रेस संसदीय दलका नेता शेरबहादुर देउवाको अध्यक्षतामा भएको सो अन्तक्रिय कार्यक्रममा कार्यबहाक प्रधानमन्त्री पूर्ण बहादुर खडका, कांग्रेस पदाधिकारी, नेपाली कांग्रेसका सांसदहरू र शिक्षाविद् तथा विभिन्न शिक्षक संघ संस्था सँग सरोकारवाला पक्षहरूको सहभागिता रहेको थियो ।