सोमनाथ ढुंगानाको निधनले पार्टीलाई ठुलो क्षती पुगेको छः कांग्रेस सभापति तथा पुर्व प्रधानमन्त्री देउवा

धादिङ,३१ साउन
नेपाली काँग्रेसका सभापति तथा पुर्वप्रधानमन्त्री शेर बहादुर देउवाले सोमनाथ ढुंगानाको निधनले पार्टीलाई ठुलो क्षती पुगेको बताउनु भएको छ । स्वर्गिय सोमनाथ ढुंगानाको १३ औँ पुण्य तिथिमा आयोजित श्रद्धाञ्जली सभालाई सम्बोधन गर्दै उहाँले पञ्चायत कालमा पनि नेपाली काँग्रेस पार्टीलाई ठुलो सहयोग गरेको भन्दै प्रजातान्त्रीक आन्दोलनमा उहाँले खेलेको भुमिका महत्वपुर्ण रहेको बताउनुभयो ।

श्रद्धाञ्जली सभाका प्रमुख अतिथी समेत रहनुभएका देउवाले धादिङ जिल्लाको नेपाली काँग्रेस पार्टीलाई यहाँ सम्म पुर्याउनको लागि सोमनाथ ढुंगानाले ठुलो सहयोग गरेको भन्दै उहाँको निधनले पार्टीलाई क्षती पुगेको बताउनुभयो । अर्को एक प्रसंगमा सभापति देउवाले सोमनाथ ढुंगानाको सुपुत्र तथा नगरपालिका संघका केन्द्रिय अध्यक्ष भीम प्रसाद ढुंगानाले विकास निर्माण लगायतको क्षेत्रमा धेरै राम्रो काम गरेको भन्दै प्रशंसा गर्नुभएको छ । स्वर्गीय सोमनाथ ढुंगाना प्रति श्रद्धाञ्जली दिनुहुदै देउवाले शोक सन्तप्त परिवारजनमा समवेदना प्रकट गर्नुभएको छ ।

देउवाले आगामी निर्वाचनमा जिल्लाभर काँग्रेस पार्टी प्रति जनलहर ल्याउन समेत आग्रह गर्नुभएको छ । यसैगरी नेपाली काँग्रेसका नेता तथा पुर्वउपसभापति विमलेन्द्र निधिले सोमनाथ ढुंगाना जस्ता शताब्दी पुरुषको योगदानकै कारण पार्टी यहाँसम्म आएको बताउनुभयो। कार्यक्रममा विशेष अतिथी समेत रहनुभएका निधिले आगामी पाँच बर्ष अहिलेको गठबन्धन कायम रहने स्पष्ट पार्नुभएको छ । स्थायी सरकार भनेको नै अहिलेको सरकार भएको भन्दै निधिले प्रधानमन्त्री फेरिएपनि गठबन्धन नफेरीने स्पष्ट पार्नुभएको छ।

नेपाली काँग्रेस धादिङका सभापति तथा प्रतिनिधिसभाका सदस्य रामनाथ अधिकारीको अध्यक्षतामा सम्पन्न भएको श्रद्धाञ्जली सभामा नेपाली काँग्रेसका सभापति तथा पुर्वप्रधानमन्त्री शेर बहादुर देउवाको प्रमुख आतिथ्यता रहेको थियो ।कार्यक्रममा पुर्वउपसभापति विमलेन्द्र निधि,छिमेकी जिल्लाका पार्टी सभापति,नेपाली काँग्रेसका केन्द्रिय सदस्यहरु,प्रदेश सांसद,महासमिति सदस्य,नेपाली काँग्रेसबाट निर्वाचित जनप्रतिनिधि लगायत शुभेच्छुकहरुको सहभागिता रहेको थियो ।