भेटेरिनरी अस्पताल द्धारा पशुसेवा शाखाका कर्मचारीहरुसंग समन्वयात्मक बैठक

धादिङ । भेटेरिनरी अस्पताल तथा पशु सेवा विज्ञ केन्द्र, धादिङद्धारा एक दिने समन्वयत्मक गोष्ठी सम्पन्न गरेको छ । भेटेरिनरी अस्पताल तथा पशुसेवा विज्ञ केन्द्र धादिङका प्रमुख डा. सन्दिप सिलवालको अध्यक्षतामा बिहीबार समन्वयत्मक बैठक सम्पन्न भएको हो ।

जिल्ला भर रहेको १३ वटै स्थानीय तहका पशुसेवा शाखा प्रमुख तथा प्राविधिक कर्मचारीहरुको उपस्थिति रहेको बैठकमा पशुपंक्षीहरुमा लाग्ने संक्रामक रोग र रोग विरद्ध सप्ताहव्यापी खोप कार्यक्रम संचालन सम्बन्धमा छलफल गरिएको भेटेरिनरी अस्पताल तथा पशुसेवा विज्ञ केन्द्र धादिङ स्रोतले जानकारी दिएको छ ।

स्थानिय तहको पशु सेवा शाखाको आ.व. २०७९/०८० मा संचालन हुनुपर्ने कार्यक्रम कार्यन्वयन अवस्थाका बारेमा पनि बैठकमा छलफल गरिएको बताइएको छ । प्रदेश र संघीय शसर्त समेत कार्यक्रमहरु संचालनको क्रममा कतिपय स्थानीय तहहरुमा केही समस्या भैरहेकोले कार्यक्रम कार्यान्वयनका लागि पनि सजिलो हुने भएकाले समन्वयात्मक बैठकको आयोजन गरिएको थियो । आजको बैठकबाट आगामी फागुन १ गतेदेखी ७ गतेसम्म संचालन गरिने साताव्यापी खोप कार्यक्रम संचालन गर्नेबारे छलफल गरिएको थियो । धादिङ जिल्लाभर रहेका पशुपंक्षीहरुमा खोप कार्यक्रम संचालनका लागि सबै स्थानीयतहहरुमा पूर्व तयारीका कार्य गर्नुका साथै स्थानीयतहहरुमा संचालन भैरहेका कार्यक्रमहरुको रिर्पोटिङ लागायतका विषयमा पनि बैठकमा छलफल गरिएको थियो ।