योजना कार्यान्वयन सम्बन्धि प्रशिक्षण तथा अभिमुखीकरण कार्यक्रम फुलखर्कमा सम्पन्न

धादिङ,३१ असोज ।
गंगाजमुना गाउँपालिकामा पहिलो पटक टोल विकास समिति तथा उपभोक्ता समितिको लागि आयोजित योजना कार्यान्वयन सम्बन्धि प्रशिक्षण तथा अभिमुखीकरण कार्यक्रम सम्पन्न भएको छ ।असोज २५ गतेदेखी सुरु भएको प्रशिक्षण तथा अभिमुखिकरण कार्यक्रम वडा नम्बर १,२,३,४,५ र ७ वडाहरुमा सम्पन्न भएको प्रमुख प्रशासकीय अधिकृत अनिल श्रेष्ठले जानकारी दिनुभयो।

टोलटोलमा गएर सन्चालन गरिएको कार्यक्रममा टोल विकास समिति तथा उपभोक्ता समितिहरूका पदाधिकारीहरुको सहभागिता रहेको थियो ।प्रशिक्षण तथा अभिमुखीकरण कार्यक्रममा सहभागिहरुलाई उपभोक्ता समिति गठन प्रक्रिया,योजनाको कार्यान्वयन तथा कार्यसम्पन्न सम्म पुरा गर्नुपर्ने प्रक्रियाहरु,भुक्तानी प्रक्रिया र प्राविधिक सम्बन्धी ज्ञानहरू बारे सम्बन्धित शाखा प्रमुखहरुले प्रशिक्षण गर्नुभएको थियो ।

यसै कार्यक्रमका संयोजक तथा प्रमुख प्रशासकीय अधिकृत अनिल श्रेष्ठले यस कार्यक्रमले विगतमा भएको कमिकमजोरी एवं त्रुटिहरूलाई सच्याई आगामी दिनहरूमा उपभोक्ता समितिहरूले गुणस्तरीय कार्य गरी बजेटको सही सदुपयोग हुने बताउनुभयो ।