धादिङको गलौदीमा सडक भासिएपछि पृथ्वी राजमार्ग पूर्ण रूपमा बन्द

धादिङ, २३ असोज । पृथ्वी राजमार्गअन्तर्गत धादिङको गजुरी गाउँपालिका–५ स्थित गलौदीमा सडक भासिएपछि उक्त सडक खण्डमा सवारीसाधन आवागमन पूर्ण रूपमा बन्द गरिएको छ ।

त्रिशूली नदीको कटानका कारण सडक भासिएपछि सम्भावित दुर्घटना रोक्न राजमार्गमा सञ्चालन हुने सम्पूर्ण सवारीसाधनको आवागमन अर्को सूचना जारी नभएसम्मका लागि बन्द गरिएको जिल्ला प्रशासन कार्यालय धादिङले जनाएको छ ।

जिल्ला प्रशासन कार्यालयले आज साँझ ६ः१५ बजे सूचना जारी गर्दै सडकमा समस्या उत्पन्न भएकाले उक्त राजमार्ग भएर चल्ने सबै प्रकारका सवारीसाधनको आवागमन पूर्ण रूपमा रोकिएको जनाएको हो ।

गलौदी क्षेत्रमा करिब १०० मिटर सडक चर्किएको र त्यसमध्ये करिब २० मिटर भाग भासिएको जिल्ला ट्राफिक प्रहरी कार्यालय धादिङका प्रमुख प्रहरी निरीक्षक शिशिर थापाले जानकारी दिनुभयो ।

उहाँका अनुसार सडकको किनारासम्मै चिरा परेकाले थप भासिने जोखिम छ । प्राविधिक टोलीले स्थलगत निरीक्षण तथा क्षतिको मूल्याङ्कन गरेपछि मात्र सडक पुनः सञ्चालनको सम्भावनाबारे यकिन गर्न सकिने उहाँले बताउनुभयो ।

राजमार्ग अवरुद्ध भएसँगै काठमाडौँबाट बाहिरिने तथा राजधानी भित्रिने सवारीसाधन प्रभावित भएका छन् । जिल्ला प्रशासन कार्यालयले अर्को सूचना जारी नभएसम्म उक्त सडकखण्ड भएर यात्रा नगर्न सम्बन्धित सबैलाई जानकारी गराएको छ ।

यस्तो छ, जिल्ला प्रशासन कार्यालय धादिबाट जारी सुचना