अन्तर्राष्ट्रिय धादिङ समाजको अध्यक्षमा खतिवडाको उम्मेदवारी घोषणा

धादिङ,२१,असोज । अन्तर्राष्ट्रिय धादिङ समाजको आगामी अध्यक्ष पदका लागि हाल अमेरिकामा रहेका सामाजिक अभियन्ता एवं समाजका उपाध्यक्ष बद्री खतिवडाले उम्मेदवारी दिने बताउनुभएको छ ।

समाजको चौथो अधिवेशन आगामी असोज ३१ गते (अक्टोबर १७) धादिङमा हुने तय भएसँगै उहाँले अध्यक्ष पदमा उम्मेदवारी दिने तयारी गर्नुभएको हो । समाजको तेस्रो अधिवेशनबाट अमेरिकाको प्रतिनिधित्व गर्दै उपाध्यक्षमा चयन हुनुभएका खतिवडा सामाजिक तथा मानवीय सेवामा सक्रिय हुनुहुन्छ ।

धादिङको गल्छी गाउँपालिका–२ स्थायी घर भएका खतिवडा विगत १५ वर्षदेखि अमेरिकामा बसोबास गर्दै आउनुभएको छ । हाल अमेरिकाको मेरिल्याण्डमा रहनुभएका उहाँले सामाजिक तथा व्यावसायिक क्षेत्रमा हासिल गरेको अनुभवलाई समाजमार्फत धादिङको विकासमा उपयोग गर्ने आफ्नो योजना रहेको बताउनुभयो ।

व्यवस्थापनमा स्नातकोत्तर (एमबिए) गर्नुभएका खतिवडाले नेपालमा ‘एक्सन नेपाल’मार्फत करिब पाँच वर्ष सामाजिक सेवाका क्षेत्रमा काम गरेको बताउनुभयो ।

अध्यक्षमा निर्वाचित भए शिक्षा, स्वास्थ्य, पर्यटन, कृषि, युवा, रोजगारी तथा उद्यमशीलताका क्षेत्रमा समाजको भूमिकालाई थप प्रभावकारी बनाउने उहाँको योजना छ । विश्वका विभिन्न मुलुकमा रहेका धादिङवासीको ज्ञान, सीप, अनुभव र आर्थिक क्षमतालाई जिल्लाको विकाससँग जोड्ने आफ्नो प्राथमिकता रहेको उहाँले बताउनुभयो ।

विद्यार्थीका लागि छात्रवृत्ति तथा ‘मेन्टोरसिप’, स्वास्थ्यकर्मीको सञ्जाल निर्माण, धादिङका पर्यटकीय क्षेत्रको अन्तर्राष्ट्रिय प्रवर्द्धन, युवाका लागि सीप तथा उद्यमशीलता कार्यक्रम र स्थानीय उत्पादनको बजारीकरणमा सहजीकरण गर्ने योजना रहेको खतिवडाले जानकारी दिनुभयो ।

उहाँले अन्तर्राष्ट्रिय धादिङ समाजलाई विश्वभर रहेका धादिङवासीबीच सहकार्य र समन्वय गर्ने प्रभावकारी संस्थाका रूपमा विकास गर्दै संस्थागत पारदर्शिता र जवाफदेहितालाई प्राथमिकता दिने बताउनुभयो ।

अन्तर्राष्ट्रिय धादिङ समाजले विभिन्न देशमा रहेका धादिङवासीलाई सङ्गठित गर्दै सामाजिक सेवा, विपद् सहयोग तथा जिल्लाको विकाससँग सम्बन्धित गतिविधि सञ्चालन गर्दै आएको छ । चौथो अधिवेशनले आगामी कार्यकालका लागि नयाँ नेतृत्व चयन गर्नेछ ।