प्रदेश प्रतिनिधिमा एरोनोटिकल इन्जिनियर मोतीराम इटनीको उम्मेदवारी

धादिङबेशी,१३ असोज । नेपाली कांग्रेसको १५औँ महाधिवेशनअन्तर्गत धादिङ प्रतिनिधिसभा क्षेत्र नं. २ ‘क’ बाट प्रदेश प्रतिनिधि (पेशागत विषयविज्ञ) पदमा एरोनोटिकल इन्जिनियर मोतीराम इटनीले उम्मेदवारी दर्ता गराएका छन्।

उम्मेदवारी दर्तासँगै इटनीले क्षेत्रीय प्रतिनिधि, पालिका तथा वडा सभापति र पार्टीका नेता–कार्यकर्तासँग मत तथा सहयोगका लागि अपिल गरेका छन्। आफ्नो पेसागत ज्ञान, अनुभव र क्षमतालाई पार्टी संगठनको हितमा उपयोग गर्दै कांग्रेसलाई थप सुदृढ, गतिशील र जनमुखी बनाउन योगदान गर्ने प्रतिबद्धता उनले जनाएका छन्।

पार्टीको नीति, सिद्धान्त र मूल्यमान्यतालाई आत्मसात् गर्दै प्रविधि, शिक्षा, रोजगारी, उद्यमशीलता, विपद् व्यवस्थापन तथा युवा सहभागिताका विषयलाई प्राथमिकताका साथ अघि बढाउने उनको भनाइ छ।

पेसाले एरोनोटिकल इन्जिनियर रहेका इटनीसँग विभिन्न एयरलाइन्स तथा उड्डयन क्षेत्रसँग सम्बन्धित संस्थामा काम गरेको अनुभव छ। विमान डिजाइन तथा उड्डयनको प्राविधिक क्षेत्रमा समेत अनुभव हासिल गरेका उनी पछिल्लो समय नेपालमा उड्डयन शिक्षालाई संस्थागत, व्यवस्थित र व्यावसायिक बनाउने अभियानमा सक्रिय छन्।

नेपालमा उड्डयन शिक्षाको पहुँच विस्तार गर्ने, विद्यार्थीलाई अन्तर्राष्ट्रियस्तरको प्रशिक्षणसँग जोड्ने तथा उड्डयनका विभिन्न विधालाई शैक्षिक संरचनाभित्र विकास गर्ने उद्देश्यसहित आफूले संस्थागत पहल गर्दै आएको उनले बताएका छन्। हाल उनी शैक्षिक तथा उड्डयन क्षेत्रमा सक्रिय छन्।

विद्यार्थी जीवनदेखि सामाजिक तथा राजनीतिक गतिविधिमा संलग्न इटनी विद्यार्थी राजनीति, सामाजिक सेवा र युवासँग सम्बन्धित विभिन्न अभियानमा सहभागी हुँदै आएका छन्। व्यावसायिक जीवनसँगै शिक्षा, प्रविधि, युवा सहभागिता र सामाजिक सेवाका क्षेत्रमा समेत सक्रिय रहँदै आएको उनको भनाइ छ।

उनले बदलिँदो समय र नयाँ पुस्ताको आवश्यकतालाई सम्बोधन गर्न राजनीतिक नेतृत्वमा नयाँ सोच, प्रविधिमैत्री कार्यशैली र परिणाममुखी दृष्टिकोण आवश्यक रहेको बताएका छन्।

इटनी विपद् व्यवस्थापन तथा खोज–उद्धारमा ड्रोन प्रविधिको प्रयोग विस्तार गर्ने अभियानमा समेत संलग्न छन्। उनका अनुसार रसुवा, नुवाकोट र धादिङका विभिन्न स्थानमा बाढी तथा अन्य विपद्का समयमा ड्रोन तथा थर्मल ड्रोन प्रयोग गरी सञ्चालन गरिएका खोज तथा उद्धार अभियानमा उनले प्राविधिक टोलीको नेतृत्व गरेका छन्।

कठिन भूगोल, सडक सम्पर्क विच्छेद भएका क्षेत्र तथा जोखिमपूर्ण स्थानमा खोज तथा उद्धार, अवस्थाबारे जानकारी सङ्कलन तथा राहत व्यवस्थापनमा ड्रोन प्रविधिको प्रयोग गरिएको उनले बताएका छन्। सडक सम्पर्क टुटेका गाउँमा राहत तथा खाद्य सामग्री पुर्‍याउने, फसेका व्यक्तिको खोजी गर्ने तथा कठिन भूगोलमा मानिसको अवस्था पत्ता लगाउने कार्यमा समेत प्रविधिको प्रयोग गरिएको उनको भनाइ छ।

ड्रोन प्रविधिलाई फोटो तथा भिडियो खिच्ने माध्यममा मात्र सीमित नराखी खोज तथा उद्धार, विपद् व्यवस्थापन, आपत्कालीन सेवा र मानवीय सहयोगमा प्रयोग गर्न सकिने सम्भावनालाई संस्थागत गर्नुपर्नेमा उनले जोड दिएका छन्।

इटनीले समाज परिवर्तनका लागि राजनीतिक गतिविधिसँगै शिक्षा, प्रविधि, सीप, व्यवस्थित संस्थागत संरचना र नागरिक सहभागितालाई समान रूपमा अघि बढाउनुपर्ने बताएका छन्। आफ्नो व्यावसायिक ज्ञान र सामाजिक अनुभवलाई सार्वजनिक सेवासँग जोड्ने उद्देश्यसहित पार्टीको आन्तरिक निर्वाचनमा उम्मेदवारी दिएको उनको भनाइ छ।

प्रदेश प्रतिनिधिमा निर्वाचित भए प्रविधिमैत्री नीति निर्माण, उड्डयन शिक्षाको विकास, विपद् व्यवस्थापनमा आधुनिक प्रविधिको प्रयोग तथा राजनीतिक प्रक्रियामा युवा सहभागिता विस्तारका विषयलाई प्राथमिकता दिने प्रतिबद्धता जनाउँदै उनले कांग्रेसका क्षेत्रीय प्रतिनिधिहरूसँग मत, विश्वास र सहयोगका लागि आग्रह गरेका छन्।