भारी वर्षाको जोखिम : नीलकण्ठवासीलाई उच्च सतर्कता अपनाउन आग्रह

धादिङ, ७ असोज : भारी वर्षाका कारण बाढी, पहिरो तथा डुबानको जोखिम बढ्न सक्ने भन्दै धादिङको नीलकण्ठ नगरपालिकाले नगरवासीलाई उच्च सतर्कता अपनाउन आग्रह गरेको छ ।

नगरपालिकाले आज सूचना जारी गर्दै जल तथा मौसम विज्ञान विभागको पूर्वानुमानअनुसार असोज ८ देखि ११ गतेसम्म देशका विभिन्न जिल्लामा मेघगर्जन, चट्याङ र हावाहुरीसहित भारी वर्षाको सम्भावना रहेको जनाएको छ । वर्षाका कारण नदीखोलामा जलस्तर बढ्न सक्ने तथा कमजोर भूभागमा पहिरो जान सक्ने भएकाले सावधानी अपनाउन अनुरोध गरिएको हो ।

नदी तथा खोलाकिनार, भिरालो जमिन, पहिरो र डुबानको जोखिम भएका क्षेत्रमा विशेष सावधानी अपनाउन नगरपालिकाले आग्रह गरेको छ । जोखिमका सङ्केत देखिएमा समयमै नजिकको सुरक्षित स्थानमा जान तथा स्थानीय तह र सुरक्षा निकायसँग समन्वय गर्न अनुरोध गरिएको छ ।

अत्यावश्यक अवस्थामा बाहेक लामो दूरी तथा रातिको यात्रा नगर्न र यात्रा गर्नुअघि सडक एवं मौसमको अवस्थाबारे जानकारी लिन पनि नगरपालिकाले आग्रह गरेको छ ।

बालबालिका, ज्येष्ठ नागरिक, अपाङ्गता भएका व्यक्ति, गर्भवती तथा बिरामीको सुरक्षामा विशेष ध्यान दिन सूचनामा भनिएको छ । साथै पशुचौपाया, खाद्यान्न, औषधि, महत्त्वपूर्ण कागजात तथा अन्य आवश्यक सामग्री सुरक्षित स्थानमा राख्न अनुरोध गरिएको छ ।

जल तथा मौसम विज्ञान विभाग, सङ्घीय तथा प्रदेश सरकार, स्थानीय तह र सुरक्षा निकायबाट जारी आधिकारिक पूर्वानुमान, पूर्वसूचना तथा चेतावनीबारे नियमित जानकारी लिन र निर्देशन पालना गर्नसमेत नगरपालिकाले आग्रह गरेको छ ।

विपद्का घटना भएमा वा हुन लागेको अवस्थामा नेपाल प्रहरीको १००, नगरपालिकाको चौबीसै घण्टा सञ्चालन हुने हटलाइन १८१०५०००३५५ वा टेलिफोन ०१०–५२०५६८ मा सम्पर्क गर्न सकिने सूचनामा उल्लेख छ ।