पूर्वप्रधानमन्त्री नेपालद्वारा धादिङका बाढी प्रभावित क्षेत्रको अवलोकन

धादिङ, ७ असोज  : पूर्वप्रधानमन्त्री तथा नेपाली कम्युनिष्ट पार्टीका सहसंयोजक माधवकुमार नेपालले आज धादिङको गल्छी गाउँपालिका–६ स्थित बाढी प्रभावित महेशदोभान क्षेत्रको अवलोकन गर्नुभएको छ ।
गत भदौ १० गते भोटेकोशी हुँदै त्रिशूली नदीमा आएको बाढीले उक्त क्षेत्रमा क्षति पु¥याएको थियो । गल्छीलगायत बाढी प्रभावित क्षेत्रको अनुगमनमा पुगेका नेपालले स्थानीय बासिन्दासँग भेटघाट गरी उनीहरूले भोगिरहेका समस्या र तत्कालका आवश्यकताबारे चासो व्यक्त गर्नुभएको छ ।

बाढीबाट क्षतिग्रस्त सडक, पुल, बस्ती तथा अन्य भौतिक संरचनाको अवस्थाबारे स्थलगत उहाँले जानकारी लिएको छ । त्यस क्रममा बाढीपीडितलाई राहत उपलब्ध गराउने, प्रभावित क्षेत्रको शीघ्र पुनःस्थापना गर्ने र क्षतिग्रस्त संरचनाको पुनर्निर्माण अघि बढाउने विषयमा समेत छलफल भएको थियो ।

नेकपाका सह–संयोजक नेपाल संगै पार्टीका वरिष्ठ नेता नारायणकाजी श्रेष्ठ, नेता हित बहादुर तामाङ, बागमती प्रदेशका पुर्व मुख्यमन्त्री समेत रहनुभएका नेकपाका नेता राजेन्द्र प्रसाद पाण्डे,शालिकराम जम्कट्टेल लगाएतका नेताहरु सहभागी हुनुभएको थियो ।