फुर्केखोलामा पुल निर्माणका लागि स्थलगत अध्ययन

धादिङ, ७ असोज : बाढीले बगाएको फुर्केखोलाको पुल निर्माणको सम्भाव्यता अध्ययन गर्न प्राविधिक टोलीले  स्थलगत निरीक्षण गरेको छ । मंगलबार संसदीय सुनुवाइ समितिका सभापति एवं धादिङ निर्वाचन क्षेत्र नं २ का सांसद बोधनारायण श्रेष्ठ,सांसद बसुमाया तामाङ सहित सडक विभागअन्तर्गतको पुल महाशाखा र भौतिक पूर्वाधार मन्त्रालयको प्राविधिक टोलीले उक्त क्षेत्रको अध्ययन गरेको हो ।

पुल महाशाखाका इन्जिनियर अञ्जली शिल्पकारका अनुसार टोलीले फुर्केखोलाआसपासको  क्षेत्रमा नदीको बहाव तथा पानीको सतहको अवस्था अध्ययन गर्नुका साथै स्थानीयवासीसँग छलफल गरेको छ । स्थलगत अध्ययनबाट प्राप्त जानकारी महाशाखा र मन्त्रालयलाई उपलब्ध गराइने उहाँले बताउनुभयो ।

गत भदौ १० गते भोटेकोसीमा आएको बाढीले धादिङबेसीलाई पृथ्वी राजमार्गसँग जोड्ने उक्त पुल बगाएको थियो । पुल बगेपछि जिल्लाको मध्य तथा उत्तरी क्षेत्रको राष्ट्रिय सडक सञ्जालसँगको सीधा सम्पर्क विच्छेद हुँदा दैनिक आवागमन र उपभोग्य वस्तुको आपूर्तिमा समस्या भएको छ । पुल तत्काल निर्माण गर्न दबाब बढिरहेको अवस्थामा मंगलबार संघिय सांसदहरु सहितको बिज्ञटोली स्थलगत अध्ययनको लागी आउनुभएको हो ।