वडा अध्यक्ष अक्षय कोष, नीलकण्ठ कर्मचारी र ब्याडमिन्टन खेलाडीको सहयोगमा नुवाकोटमा राहत वितरण

धादिङ,१७ भदौ
भदौ १० गते गएको बाढी तथा विपद्बाट प्रभावित नुवाकोटका नागरिकलाई वडा अध्यक्ष अक्षय कोष, नीलकण्ठ नगरपालिका कर्मचारी परिवार तथा धादिङका ब्याडमिन्टन खेलाडीहरूको सहयोगमा राहत वितरण गरिएको छ।नीलकण्ठ नगरपालिका वडा नम्बर ३ को वडा अध्यक्ष अक्षय कोष, नीलकण्ठ नगरपालिका कर्मचारी परिवार एवं धादिङका ब्याडमिन्टन खेलाडीहरूको संयुक्त सहयोगमा संकलन गरिएको राहत सामग्री बाढी प्रभावित क्षेत्रमै पुगेर वितरण गरिएको हो।

बाढीका कारण घरबार तथा परिवारको आश्रय गुमाएका प्रभावित नागरिकलाई लत्ताकपडा तथा सरसफाइका आवश्यक सामग्री वितरण गरिएको नीलकण्ठ नगरपालिकाका प्रमुख प्रशासकीय अधिकृत हरिदत्त कँडेलले जानकारी दिनुभयो।नीलकण्ठ नगरपालिका वडा नम्बर ३ का वडा अध्यक्ष राजकुमार श्रेष्ठ तथा प्रमुख प्रशासकीय अधिकृत कँडेलसहितको टोली प्रभावित क्षेत्रमा पुगेर राहत सामग्री वितरण गरेको हो।

राहत वितरणका क्रममा विशेषगरी महिला तथा बालबालिकाको आवश्यकतालाई प्राथमिकतामा राखिएको वडा अध्यक्ष राजकुमार श्रेष्ठले बताउनुभयो। उहाँले विपद्का कारण समस्यामा परेका नागरिकलाई आवश्यक सामग्री उपलब्ध गराउने उद्देश्यले सहयोग अभियान सञ्चालन गरिएको जानकारी दिनुभयो।बाढी तथा विपद्ले प्रभावित नागरिकको जनजीवन सामान्य अवस्थामा फर्काउन विभिन्न व्यक्ति तथा संघसंस्थाबाट सहयोग जुट्ने क्रम जारी रहेको छ।