थाक्रे गाउँपालिकाद्वारा बाढीपीडितलाई राहत, उद्धार तथा पुनःस्थापनाका लागि सहयोग गर्ने निर्णय ।

धादिङ, भदौ १५:
धादिङको थाक्रे गाउँपालिकाले भोटेकोशी बाढी तथा पहिरोबाट प्रभावित नागरिकको राहत, उद्धार तथा पुनःस्थापनाका लागि विभिन्न निर्णय गरेको छ । गाउँपालिकाको १५८औँ कार्यपालिका बैठकले विपद्का कारण मृत्यु भएका तथा हालसम्म सम्पर्कविहीन रहेका व्यक्तिका परिवारलाई प्रतिव्यक्ति ५० हजार रुपैयाँ राहत दिने निर्णय गरेको हो।
गाउँपालिकाले मुख्यमन्त्री विपद् व्यवस्थापन तथा राहत कोषमा १० लाख रुपैयाँ सहयोग गर्ने निर्णयसमेत गरेको छ। भदौ १० गते आएको बाढी तथा पहिरोबाट मृत्यु भएका तथा सम्पर्कविहीन रहेका व्यक्तिका परिवारलाई तत्काल राहत उपलब्ध गराउने उद्देश्यले प्रतिपरिवार ५० हजार रुपैयाँ प्रदान गर्न लागिएको गाउँपालिकाले जनाएको छ।
यसैगरी, गाउँपालिकाका जनप्रतिनिधिहरूले व्यक्तिगत रूपमा समेत राहत रकम उपलब्ध गराउने भएका छन्। गाउँपालिका अध्यक्ष र उपाध्यक्षले ३०–३० हजार रुपैयाँ, प्रत्येक वडा अध्यक्षले १५ हजार रुपैयाँ तथा वडा सदस्यले ५ हजार रुपैयाँका दरले सहयोग गर्ने निर्णय गरिएको छ।
जनप्रतिनिधिहरूबाट मात्रै कुल ५ लाख १५ हजार रुपैयाँ नगद सहयोग उपलब्ध हुने गाउँपालिकाले जनाएको छ।
बाढी तथा पहिरोबाट अति प्रभावित स्थानीय तहलाई समेत थाक्रे गाउँपालिकाले सहयोग गर्ने भएको छ। विशेषगरी रसुवाका उत्तरगया गाउँपालिका र गोसाइँकुण्ड गाउँपालिकालगायत संकटग्रस्त स्थानीय तहमा आवश्यकताअनुसार अत्यावश्यक राहत सामग्री उपलब्ध गराउने निर्णय गरिएको छ।
खाद्यान्न, लत्ताकपडा, खानेपानी तथा अन्य अत्यावश्यक सामग्री आवश्यक परे सम्बन्धित स्थानीय तहसँग समन्वय गरी उपलब्ध गराइने गाउँपालिकाले जनाएको छ।
विपद्का कारण ज्यान गुमाएका तथा सम्पर्कविहीन व्यक्तिका परिवारलाई प्रत्यक्ष आर्थिक राहत, प्रभावित नागरिकलाई उद्धार तथा राहत र संकटग्रस्त स्थानीय तहलाई आवश्यक सामग्री सहयोग गर्ने निर्णयले तत्कालीन राहत तथा पुनःस्थापनामा सहयोग पुग्ने अपेक्षा गरिएको छ।