धान दिवसमा दही–चिउरा खाएर सांस्कृतिक पर्व मनाइयो

धादिङबेशी,१६ असार । असार १५ अर्थात् राष्ट्रिय धान दिवस तथा दही–चिउरा खाने पर्व देशभर विभिन्न कार्यक्रमका साथ मनाइएको छ । कृषिप्रधान नेपालको परम्पराअनुसार किसानले खेतमा धान रोप्दै दही–चिउरा खाएका छन् भने अन्य पेसा र व्यवसायमा आबद्ध नागरिकले पनि दही–चिउरा सेवन गरी पर्व मनाएका छन् ।

असार १५ लाई धान रोपाइँको मुख्य समयका रूपमा लिइन्छ । उक्त दिन खेतमा असारे भाका, लोकदोहोरी गीत र परम्परागत सांस्कृतिक गतिविधिबीच धान रोप्ने चलन रहिआएको छ । दही–चिउरा शरीरलाई शीतलता दिने, पाचनमा सहयोग गर्ने तथा ऊर्जा प्रदान गर्ने विश्वासका कारण पनि यो पर्वसँग जोडिएको मानिन्छ ।

नेपाल सरकारले विसं २०६२ सालदेखि असार १५ लाई राष्ट्रिय धान दिवसका रूपमा मनाउन थालेको हो । धान उत्पादन वृद्धि, कृषिप्रति आकर्षण बढाउने तथा किसानको योगदानको सम्मान गर्ने उद्देश्यले प्रत्येक वर्ष यो दिवस मनाइँदै आएको छ । यस वर्ष भने असारको मध्यसम्म पनि देशका अधिकांश क्षेत्रमा पर्याप्त वर्षा नहुँदा अपेक्षाअनुसार धान रोपाइँ हुन सकेको छैन । केही स्थानमा रासायनिक मलको अभाव रहेको गुनासो पनि किसानले गरेका छन् ।

यसैबीच, धादिङका विभिन्न स्थानीय तह, कृषि कार्यालय तथा सामाजिक संस्थाले पनि धान दिवसको अवसरमा धान रोपाइँ, सांस्कृतिक कार्यक्रम र कृषक सम्मानलगायत विविध कार्यक्रम आयोजना गरी दिवस मनाएका छन् ।